Yenicə istifadəyə verilmiş Saparmurad Türkmənbaşı adına beynəlxalq hava limanında Azərbaycanın və Türkmənistanın dövlət bayraqları dalğalanırdı. Burada Azərbaycan dövlətinin başçısını Türkmənistan Məclisinin sədri Səhhət Muradov və digər rəsmi şəxslər qarşıladılar. Milli paltar geyinmiş qızlar, ağsaqqallar el adəti üzrə Azərbaycan Prezidentinə duz-çörək təqdim etdilər. Sonra Heydər Əliyev və Səhhət Muradov fəxri qarovul sırasının önündən keçdilər. Fəxri qarovul dəstəsinin rəisi hörmətli qonağa raport verdi.

Heydər Əliyev və Səhhət Muradov fəxri qonaqlar üçün nəzərdə tutulan tribunaya qalxdılar. Orkestr Azərbaycanın və Türkmənistanın Dövlət himnlərini ifa etdi. Türkmənistan Milli Qoşununun əsgərləri Azərbaycan Prezidentinin dayandığı tribunanın önündən səlis addımlarla keçdilər.

Azərbaycan Prezidenti Heydər Əliyev onu qarşılamağa gəlmiş Türkmənistan Respublikasının vəzifəli şəxsləri ilə görüşdü. Məktəblilər ali qonağı türkmən xalqının milli rəqsləri ilə salamladılar.

Maşın karvanı Heydər Əliyevi və onu müşayiət edən şəxsləri Aşqabadın “Məkan” sarayına gətirdi. Türkmənistanın müstəqillik qazanmasının üçüncü ildönümü şənliklərində iştirak edən Türkiyə Respublikasının Prezidenti Süleyman Dəmirəl, Pakistanın Baş naziri Bənəzir Bhutto da buraya gəlmişdilər. Sarayda böyük bayram konserti verildi. Konsert başa çatdıqdan sonra Türkmənistan Prezidenti Saparmurad Niyazov, fəxri qonaqlar - Türkiyə Prezidenti Süleyman Dəmirəl, Azərbaycan Prezidenti Heydər Əliyev, Pakistanın Baş naziri Bənəzir Bhutto səhnəyə qalxdılar. Bütün salondakılar ayağa qalxaraq, ali qonaqları bir daha gurultulu alqışlarla salamladılar. Konsertin finalı türkdilli xalqların dostluq, qardaşlıq və həmrəyliyinə çağırışla başa çatdı.

Həmin gün Azərbaycan Prezidenti Heydər Əliyev öz iqamətgahında Pakistanın Baş naziri Bənəzir Bhutto ilə görüşdü.

Sonra Azərbaycan Prezidenti Türkiyə Prezidenti Süleyman Dəmirəlin iqamətgahına gəldi və burada iki dövlət başçısı arasında görüş keçirildi.

Oktyabrın 27-də səhər Azərbaycan Prezidenti Heydər Əliyev Türkiyə Prezidenti Süleyman Dəmirəl, İran İslam Respublikasının Prezidenti Haşimi-Rəfsəncani, Pakistanın Baş naziri Bənəzir Bhutto Aşqabadın mərkəzi meydanına gəldilər. Mərkəzi tribunada fəxri qonaqları Türkmənistan Prezidenti Saparmurad Niyazov qarşıladı. Türkmənistanın müstəqillik qazanmasının üçüncü ildönümü münasibətilə meydanda hərbi parad və zəhmətkeşlərin nümayişi keçirildi.

Elə həmin gün fəxri qonaqlar Türkmənistan-İran-Türkiyə-Avropa qaz kəmərinin rəmzi açılışı mərasimində iştirak etdilər. Mərasimdə İran İslam Respublikasının Prezidenti Haşimi-Rəfsəncani, Türkiyə Respublikasının Prezidenti Süleyman Dəmirəl, Pakistanın Baş naziri Bənəzir Bhutto, Azərbaycan Respublikasının Prezidenti Heydər Əliyev, Türkmənistan Prezidenti Saparmurad Niyazov çıxış etdilər.

Azərbaycan Prezidenti Heydər Əliyev çıxış etdi.

Sonra fəxri qonaqlar öz iqamətgahlarına qayıtdılar.

Azərbaycan Prezidenti Heydər Əliyevlə İran İslam Respublikasının Prezidenti Haşimi-Rəfsəncani arasında görüş oldu.

Sonra Heydər Əliyev Vətənə qayıtmaq üçün Aşqabad hava limanına gəldi. Burada Azərbaycan Respublikasının Prezidenti Heydər Əliyevlə Türkmənistan Respublikasının Prezidenti Saparmurad Niyazov arasında görüş oldu.

Aşqabad hava limanında təntənəli yolasalma mərasimi keçirildi. Azərbaycan Prezidenti Heydər Əliyevi Türkmənistan Prezidenti Saparmurad Niyazov, Türkmənistan parlamentinin sədri Səhhət Muradov və ölkənin digər rəhbər xadimləri səmimiyyətlə yola saldılar.

Azərbaycan Prezidenti Heydər Əliyev İran İslam Respublikası və Türkmənistan prezidentləri ilə keçirdiyi görüşlər barədə təyyarədə jurnalistlərin suallarına cavab verdi.

Xəbər verdiyimiz kimi, oktyabrın 27-də axşam Azərbaycan Prezidenti Heydər Əliyev Aşqabaddan Bakıya qayıtmışdır. Səfərdə Prezidenti respublikanın xarici işlər naziri Həsən Həsənov, dövlət müşaviri Vəfa Quluzadə və digər rəsmi şəxslər müşayiət edirdilər.

Aslam Aslanov

AZƏRTAC-ın xüsusi müxbiri

Aşqabad