AZƏRBAYCAN RESPUBLİKASININ PREZİDENTİ İLHAM ƏLİYEVİN NİTQİ
Hörmətli xanım Kvon Yanq Suk!
Əziz qonaqlar!
Xanımlar və cənablar!
İlk növbədə, cənab Prezident, Sizi və rəhbərlik etdiyiniz nümayəndə heyətini Azərbaycanda bir daha səmimiyyətlə salamlayır və “Xoş gəlmisiniz!” deyirəm. Bu, Koreya Respublikası Prezidentinin Azərbaycana ilk rəsmi səfəridir. İnanıram ki, Sizin səfəriniz ölkələrimiz arasında münasibətlərin inkişafında mühüm rol oynayacaqdır. Keçirdiyimiz görüşlər zamanı biz ikitərəfli əməkdaşlıqla bağlı geniş fikir mübadiləsi, danışıqlar apardıq. Əminəm ki, bütün bunlar və eyni zamanda imzalanmış sənədlər, iki ölkənin iş adamlarının təşkil etdiyi biznes forumu əlaqələrimizin inkişafına və genişlənməsinə öz töhfəsini verəcəkdir. Azərbaycanla Koreya Respublikası arasındakı münasibətlərin tarixi kökləri var. Qədim dövrlərdən başlayaraq ölkələri birləşdirən, sivilizasiyaların inkişafına, sülhə xidmət edən Böyük İpək Yolu xalqlarımızın tarixində çox mühüm rol oynamışdır. Mən ölkələrimiz arasında əməkdaşlığın müxtəlif sahələrdə dərinləşməsinin tərəfdarıyam. Bu baxımdan müqavilə hüquq bazasının yaradılması, qarşılıqlı səfərlər, Azərbaycanda və Koreya Respublikasında mədəniyyət günlərinin keçirilməsi yaxşı nümunədir. Eyni zamanda, ölkənizdə səfirlik təsis etmişik. Bakı Dövlət Universitetində Koreya dili şöbəsi fəaliyyət göstərir. İkitərəfli münasibətlərimizdə maraq doğuran neft və neft-kimyası, yanacaq və energetika, tikinti, nəqliyyat, informasiya və kommunikasiya texnologiyaları, mədəniyyət, hava nəqliyyatı və digər sahələrdə qarşılıqlı surətdə faydalı əməkdaşlığımızın yaxşı perspektivləri vardır.
Bu gün Azərbaycan böyük sürətlə inkişaf edən dövlətdir. 2005-ci ildə ölkə iqtisadiyyatı ən yüksək inkişaf tempinə malik olmuş, ümumi daxili məhsulun həcmi 26 faizdən çox artmışdır. Son iki il yarım ərzində ölkədə 380 min yeni iş yeri açılmışdır. Azərbaycan regionda sabitliyin və təhlükəsizliyin möhkəmlənməsinə, iqtisadi inkişafa və inteqrasiyaya təkan verəcək beynəlxalq layihələr həyata keçirir. Bakı-Tbilisi-Ceyhan neft kəməri, Bakı-Tbilisi-Ərzurum qaz kəməri, Bakı-Tbilisi-Qars dəmir yolu layihələri bütün regionun inkişafında mühüm rol oynayacaqdır.
Lakin mövcud münaqişələri aradan qaldırmadan regionda sülhə və təhlükəsizliyə nail olmaq mümkün deyildir. Ermənistanın Azərbaycana qarşı hərbi təcavüzü regionda sabitliyi pozan başlıca amildir. Bu təcavüz və etnik təmizləmə siyasəti nəticəsində torpaqlarımızın 20 faizi işğal edilmiş, ölkədə bir milyondan çox qaçqın və məcburi köçkün yaranmışdır. Biz münaqişənin beynəlxalq hüququn normaları və prinsiplərinə uyğun, ölkəmizin ərazi bütövlüyü çərçivəsində, ədalətli şəkildə nizama salınmasını münaqişə ilə bağlı BMT Təhlükəsizlik Şurasının qətnamələrinin, ATƏT-in, Avropa Şurasının və digər beynəlxalq təşkilatların qərarlarının yerinə yetirilməsini tələb edirik.
Hörmətli cənab Prezident!
Azərbaycana rəsmi səfər etməyinizdən məmnun olduğumu bir daha ifadə edir, Sizə cansağlığı, ölkənizə və xalqınıza daim inkişaf və uğurlar arzulayıram.
Cənab Prezident, icazə verin, bu badəni Sizin şərəfinizə, xanım Kvon Yanq Sukun şərəfinə, Azərbaycanla Koreya Respublikası arasında səmimi dostluq və faydalı əməkdaşlıq əlaqələrinin inkişafı şərəfinə qaldırım.
Bölmənin digər xəbərləri
