AZƏRBAYCAN ŞƏFFAFLIQ TƏŞƏBBÜSÜ ÜZRƏ NÖVBƏTİ HESABATINI AÇIQLAMIŞDIR
Azərbaycan Respublikası Dövlət Neft Fondunun mətbuat xidmətindən AZƏRTAC-a bildirmişlər ki, “Mineral Ehtiyatların Hasilatı ilə Məşğul olan Sənaye Sahələrində Şəffaflıq Təşəbbüsü (MHŞT)” adı altında 2003-cü il iyunun 17-də Londonda keçirilmiş konfransdan irəli gələn öhdəliklərin yerinə yetirilməsini təmin etmək məqsədi ilə Azərbaycan Hökumətinin yaratdığı MHŞT üzrə Komissiya AGN Mak audit şirkəti tərəfindən yoxlanılmış Azərbaycan Respublikası Hökumətinin mədən hasilatı sənayesində əldə etdiyi məcmu daxilolmaları barədə növbəti (üçüncü) hesabatını (2005-ci ilin yanvar-iyun ayları üzrə) - 2005-ci il yanvarın 27-də açıqlamışdır. Dərc edilən hesabatlara, eyni zamanda, hasilat (neft-qaz) sənayesində fəaliyyət göstərən şirkətlərin təqdim etdikləri fərdi hesabatların təhlili əsasında audit şirkətinin verdiyi rəy də daxildir.
Bununla da mineral ehtiyatlarının hasilatı ilə məşğul olan sənaye sahələrindən məcmu gəlirlər barədə artıq üçüncü hesabatını dərc etdirən Azərbaycan Hökuməti təşəbbüslə bağlı üzərinə götürdüyü öhdəlikləri həyata keçirməkdə davam etdiyini təsdiqləmişdir. Şəffaflıq Təşəbbüsü çərçivəsində təqdim edilmiş hesabatların dərc olunması Mineral Ehtiyatlarının Hasilatı ilə Məşğul olan Sənaye Sahələrində Şəffaflıq Təşəbbüsü (MHŞT) üzrə Komissiya, Azərbaycanın hasilat (neft və qaz) sənayesində fəaliyyət göstərən yerli və xarici şirkətlər və 32 qeyri-hökumət təşkilatının (QHT) təmsil olunduğu Mədən Sənayesində Şəffaflığın Artırılması Koalisiyası arasında 2004-cü il noyabrın 24-də imzalanmış qarşılıqlı Anlaşma haqqında Memoranduma əsasən həyata keçirilir.
AGN Mak audit şirkətinin Rəyində deyilir: “2005-ci il iyunun 30-da başa çatan altı ay ərzində qəbul olunmuş ödənişlərin/daxilolmarın cədvəli ilə bağlı Azərbaycan Respublikasının MHŞT Komissiyasının bəyannaməsi yuxarıda qeyd edilən tələblərə uyğun surətdə hazırlanmış, bütün əhəmiyyətli hallarda düzgün əks olunmuşdur”.
Ölkənin hesabatı, eləcə də audit şirkətinin rəyi ilə Dövlət Neft Fondunun, habelə MHŞT üzrə Katiblik funksiyalarını yerinə yetirən Böyük Britaniyanın Beynəlxalq İnkişaf Nazirliyinin və QHT-lərin təmsil olunduğu Mədən Hasilatında Şəffaflığın Artırılması Koalisiyasının internet səhifələrində yerləşdirilmişdir.
Hökumətin Şəffaflıq Təşəbbüsü üzrə üçüncü hesabatı audit (AGN Mak) şirkətinin rəyi ilə birlikdə 2006-cı il yanvarın 16-da keçirilmiş iclasda Memorandum tərəflərinə təqdim olunmuşdur. Tərəflərin birgə iclasında, həmçinin üçüncü hesabat dövrünün nəticələri müzakirə edilmişdir. Müzakirələr zamanı Memorandum tərəfləri hökumətin və şirkətlərin xam neftin ABƏŞ tərəfindən Azərbaycan hökumətinə təhvil verilməsi və Bakı-Tbilisi-Ceyhan neft kəmərinin doldurulması üçün BTC şirkətinin neftlə təmin olunması ilə bağlı birgə hesabat prosedurlarının təkmilləşdirilməsi məqsədi ilə əlavə səylərin göstərilməsinin vacibliyini vurğulamışlar.
Bölmənin digər xəbərləri
