Azərbaycan və İtaliya alimləri kimyanın davamlı inkişafda rolu ilə bağlı müzakirələr aparıblar
Bakı, 18 aprel, AZƏRTAC
Azərbaycan Milli Elmlər Akademiyasının (AMEA) Mərkəzi Elmi Kitabxanasında (MEK) “Kimyanın davamlı inkişafda rolu” mövzusunda Azərbaycan-İtaliya beynəlxalq elmi seminarı keçirilib.
AZƏRTAC xəbər verir ki, akademiyanın Rəyasət Heyəti aparatının beynəlxalq əlaqələr idarəsi, M.Nağıyev adına Kataliz və Qeyri-üzvi Kimya İnstitutu və İtaliyanın Azərbaycandakı səfirliyi tərəfindən birgə təşkil olunan tədbirdə AMEA-nın vitse-prezidenti, akademik Dilqəm Tağıyev müasir dünyada elmin mühüm rolundan danışıb, Prezident İlham Əliyevin bu sahənin inkişafına xüsusi önəm verdiyini bildirib.
Azərbaycan-İtaliya əlaqələrinin əhəmiyyətini vurğulayan akademik D.Tağıyev bu seminarın əlamətdar bir vaxtda - bütün dünyada İtaliya Tədqiqatlar Gününün qeyd edildiyi bir zamanda keçirildiyini söyləyib.
Akademik ölkələrimizin elmi əlaqələrinin inkişaf etdiyini diqqətə çatdırıb, AMEA ilə İtaliya Milli Tədqiqatlar Şurası arasında əməkdaşlıq sazişinin imzalandığını, birgə tədqiqat proqramlarının elan edildiyini bildirib.
İtaliyanın Bakıdakı səfiri Auqusto Massari hər iki ölkənin elmi mərkəzləri arasındakı əlaqələrin müxtəlif istiqamətlərdə, o cümlədən kimya sahəsində inkişaf etdirilməsinin vacibliyini vurğulayıb.
AMEA-nın Kataliz və Qeyri-üzvi Kimya İnstitutu direktorunun elmi işlər üzrə müavini, AMEA-nın müxbir üzvü Məhəmməd Babanlının “Topoloji izolyator materiallarının dizaynının kimyəvi aspektləri” mövzusunda məruzəsi dinlənilib. Alim bildirib ki, Azərbaycanda topoloji izolyator materialları sahəsində sistemli tədqiqatlar 2011-ci ildən aparılır. Bu müddətdə Avropa İttifaqının və Yaponiyanın topoloji izolyatorların nəzəri və təcrübi tədqiqi ilə məşğul olan aparıcı elmi mərkəzləri ilə geniş beynəlxalq əlaqələr qurulub.
M.Babanlı hazırda İtaliyanın bir sıra elmi müəssisələri ilə birgə tədqiqatların aparıldığını və onların nəticələrinin “Web of Science” platformasına daxil olan yüksək impakt faktorlu jurnallarda çap edildiyini diqqətə çatdırıb.
İnstitutun laboratoriya müdiri, professor Nizami Zeynalov “Polimer nanogellər dərman maddələrinin immobilizasiyasında daşıyıcı kimi” mövzusunda məruzəsində bildirib ki, son illər nanogellərin sintezi və onların iştirakı ilə dərman preparatlarının uzun müddətli təsirə malik olmaları tədqiqatçıların diqqətindədir. Alim bu sahədə polimerlərdən istifadənin dərman preparatlarının lazımi orqanlara çatdırılmasında mühüm rol oynadığını söyləyib.
Sonra İtaliyanın “Kinetics Technology” şirkətinin innovasiya strategiyası üzrə vitse-prezidenti Qaetano Yakuanellonun “İnkişafın davamlılığının və tərəqqinin təmin olunmasında kimya və kimya mühəndisliyinin rolu nədir?” və Roma Tor Verqata Universitetinin professoru Massimiliano Barlettanın “Bioplastik materialların təkmilləşdirilməsi və onların emalı” mövzularında məruzələri dinlənilib.
Tədbirdə dünyanın aparıcı elmi təşkilatları ilə beynəlxalq əməkdaşlıq perspektivləri, yeni əməkdaşlıq mexanizmlərinin yaradılması imkanları da müzakirə olunub.
Bölmənin digər xəbərləri
