AZƏRBAYCAN VƏ RUSİYA HƏRBİ-TEXNİKİ ƏMƏKDAŞLIQ HAQQINDA HÖKUMƏTLƏRARASI SAZİŞ İMZALAMIŞLAR
Ölkəmizdə rəsmi səfərdə olan Rusiya Federasiyasının müdafiə naziri Sergey İvanov fevralın 27-də Şəhidlər xiyabanını ziyarət edərək, ölkəmizin azadlığı və ərazi bütövlüyü uğrunda canlarını qurban vermiş Azərbaycan övladlarının məzarları üstünə gül, “Əbədi məşəl” abidəsinin önünə əklil qoydu.
Müdafiə Nazirliyində qonağın rəsmi qarşılanma mərasimindən sonra danışıqlar oldu.
Danışıqlar başa çatdıqdan sonra iki ölkənin müdafiə nazirləri - Səfər Əbiyev və Sergey İvanov hərbi-texniki əməkdaşlıq haqqında hökumətlərarası sazişi və 2003-cü ildə Azərbaycanın və Rusiyanın müdafiə nazirlikləri arasında ikitərəfli əməkdaşlıq planını imzaladılar.
Sənədlərin imzalanması mərasimindən sonra keçirilən mətbuat konfransında Rusiyanın müdafiə naziri dedi ki, hökumətlərarası saziş ölkələrimiz arasında imzalanmış ilk belə sənəddir. Saziş hər iki ölkənin tammiqyaslı hərbi və hərbi-texniki əməkdaşlıq etməsinə imkan verir. Sənəddə silah, hərbi texnika və ehtiyat hissələri göndərilməsinə, hərbi kadrlar hazırlanmasına dair müqavilələrin bağlanmasının mümkünlüyü nəzərdə tutulur. Sergey İvanov imzalanmış sənədlərdən razı qaldığını ifadə edərək bildirdi ki, Rusiyanın, əslində, MDB-nin bütün dövlətləri ilə bu cür sazişləri var.
Ölkəmizin müdafiə naziri, general-polkovnik Səfər Əbiyev İraq ətrafında vəziyyət, Azərbaycanın bu məsələdə mövqeyi barədə sualın cavabında bildirdi ki, biz bu regionda baş verən hadisələri narahatlıqla izləyirik. Azərbaycan İraqı BMT Təhlükəsizlik Şurasının bütün qətnamələrini yerinə yetirməyə çağırır. Bizcə, İraq hökuməti ABŞ dövlət katibinin BMT Təhlükəsizlik Şurasına təqdim olunmuş məruzəsində göstərilən faktlar əsasında beynəlxalq müfəttişlərlə sıx əməkdaşlıq edəcəkdir. Azərbaycan ABŞ-ın kütləvi qırğın silahının ləğvinə və böhranın BMT Nizamnaməsi əsasında tezliklə həllinə yönəldilmiş səylərini dəstəkləyir.
Azərbaycanın guya Dağlıq Qarabağda güc işlətməyə hazırlaşdığı barədə son vaxtlar Rusiyanın kütləvi informasiya vasitələrində tez-tez verilən xəbərləri şərh etmək xahişinə cavabında Səfər Əbiyev bildirdi: Ermənistanın təcavüzü nəticəsində Azərbaycan ərazisinin 20 faizi işğal olunmuş və bir milyon nəfərə yaxın soydaşımız öz torpaqlarında qaçqın-köçkünə çevrilmişdir, indiyədək çadır şəhərciklərində yaşayır.
Nazir dedi ki, Ermənistanın öz hərbi potensialını gücləndirməsi Azərbaycanı, şübhəsiz, narahat edir. 1993-1996-cı illərdə bu ölkəyə qanunsuz olaraq bir milyard ABŞ dollarından artıq məbləğdə silah və hərbi texnika verilmişdir. İndi bütün bu silahlar işğal olunmuş ərazilərdə cəmləşdirilmişdir və onlardan hər an istifadə edilə bilər. Bu isə regionumuzda sabitliyi pozur.
Səfər Əbiyev həmin məsələyə Rusiya naziri ilə danışıqlarda da toxunulduğunu və bu halın sabitliyi pozan amil olduğunun qeyd edildiyini bildirdi. Nəzarət edilməyən ərazilərdə terrorçu qruplar hazırlanır, bu ərazilərdən silahlar terrorçu rejimlərə və təşkilatlara ötürülür. Müdafiə naziri dedi: “Azərbaycan məhkəməsi tərəfindən məhkum olunmuş 20-dən artıq adamın verdiyi ifadələrdə deyilir ki, onlar Dağlıq Qarabağ və Ermənistan ərazisində hazırlıq keçmiş, sonra da terror aktları törətmək üçün başqa dövlətlərə göndərilmişlər. Bu, təkcə Azərbaycanı deyil, Rusiyanı da narahat etməlidir. Qəsb olunmuş ərazilər azad edilməsə, Azərbaycan ərazi bütövlüyünü özü bərpa etməli olacaqdır”.
Ölkəmizin müdafiə idarəsinin başçısı həmçinin bəyan etdi ki, bu gün hökumətlərarası sazişi imzalamaqla Rusiya Azərbaycanın ərazi bütövlüyünü və sərhədlərinin toxunulmazlığını tanıdığını təsdiqləyir.
Rusiya naziri onun ölkəsinin 1993-1996-cı illərdə Ermənistana bir milyard ABŞ dollarından artıq məbləğdə qanunsuz silah göndərməsi faktlarının araşdırılmasının gedişi barədə suala cavabında dedi ki, cinayət tərkibi olmadığına görə prokurorluq bu işi bağlamışdır.
Sonda nazirlər bir-birinə xatirə nişanları hədiyyə etdilər.
Görüşdə və imzalanma mərasimində Rusiyanın ölkəmizdəki səfiri Nikolay Ryabov iştirak edirdi.
Bölmənin digər xəbərləri
