AZƏRBAYCAN XALQ CÜMHURİYYƏTİNİN 90 İLLİK YUBİLEYİNƏ HƏSR OLUNMUŞ ELMİ-PRAKTİK KONFRANS KEÇİRİLMİŞDİR
AZƏRTAC xəbər verir ki, mayın 27-də Muzey Mərkəzinin konfrans zalında Azərbaycan Xalq Cümhuriyyətinin 90 illik yubileyinə həsr olunmuş konfrans keçirilmişdir.
BDU tarix fakültəsinin mənbəşünaslıq, tarixşünaslıq və metodika kafedrasının müdiri, tarix elmləri doktoru, professor Anar İsgəndərov 1918-ci il mayın 28-də müsəlman Şərqində yaranan ilk Azərbaycan Xalq Cümhuriyyətinin banisi Məmməd Əmin Rəsulzadədən və onun silahdaşlarından söhbət açmışdır. O bildirmişdir ki, bu qurum 23 ay yaşamasına baxmayaraq, böyük ideallara xidmət etmişdir. İlk dəfə Azərbaycan adını dünyaya tanıtmış, Azərbaycan dilini dövlət dili kimi təsdiq etmiş, ordu yaratmış, təhsil sisteminin əsasını qoyaraq universitet yaratmış, xarici ölkələrlə diplomatik münasibətlər qurmuş, beynəlxalq məclislərdə Azərbaycanı təbliğ etmişdir.
Digər natiqlər qeyd etmişlər ki, əsası 90 il bundan əvvəl qoyulmuş ideyalar bu gün də yaşayır. Müstəqil Azərbaycan özünü Demokratik Cümhuriyyətin varisi hesab etməklə həmin ideyaları bu gün də yaşadır.
Konfransda Azərbaycan Xalq Cümhuriyyətinin tarixinə nəzər salınmış, o dövrdə cərəyan edən hadisələrlə bağlı fikirlər bildirilmişdir.
Konfransda M.Ə.Rəsulzadənin nəvəsi Rayis Rəsulzadə də iştirak etmişdir.
Muzeyin 6 salonunda Azərbaycan Xalq Cümhuriyyəti, Böyük Vətən müharibəsi, 20 Yanvar, Xocalı və Qarabağ hadisələri ilə bağlı sərgi nümayiş etdirilmişdir.
Bölmənin digər xəbərləri
