AZƏRBAYCAN XALQ CÜMHURİYYƏTİNİN ORDU GENERALI ƏLAĞA ŞIXLİNSKİNİN DOĞUM GÜNÜ QEYD OLUNMUŞDUR
AZƏRTAC xəbər verir ki, aprelin 23-də Azərbaycan Qızıl Aypara Cəmiyyətinin təşəbbüsü və təşkilatçılığı, Müdafiə Nazirliyi, Yasamal Rayon İcra Hakimiyyəti nümayəndələrinin iştirakı ilə Əlağa Şıxlinskinin vaxtilə yaşadığı binanın qarşısında anma mərasimi keçirilmişdir.
Binanın divarındakı barelyefin önünə gül-çiçək dəstələri düzülmüş, Azərbaycan Xalq Cümhuriyyətinin ordu generalı, ölkəmizdə Qızıl Aypara Cəmiyyətinin yaradıcılarından biri Əlağa Şıxlinskinin xatirəsi bir dəqiqəlik sükutla yad edilmişdir.
Azərbaycan Qızıl Aypara Cəmiyyətinin vitse-prezidenti Qafar Əsgərzadə Əlağa Şıxlinskinin Azərbaycan Xalq Cümhuriyyətinin yaranmasında, Qızıl Aypara Cəmiyyətinin və Azərbaycanda “Şəfqət xidməti” məktəbinin təşkilindəki xidmətlərindən danışmışdır.
Müdafiə Nazirliyi adından Şəmistan Nəzirli, Yasamal Rayon İcra Hakimiyyətinin şöbə müdiri Vaqif Məmmədov və başqaları Əlağa Şıxlinskinin xidmətlərindən danışmış, Azərbaycan Xalq Cümhuriyyətinin 90 illiyi ərəfəsində belə bir tədbirin təşkilinə görə Azərbaycan Qızıl Aypara Cəmiyyətinin prezidenti, Milli Məclisin deputatı Novruzəli Aslanova minnətdarlıqlarını bildirmişlər.
