Azərbaycanda bioloji müxtəlifliyin qorunması yüksək səviyyədə təmin olunmuşdur
Bakı, 25 aprel (AZƏRTAC). Ümummilli lider Heydər Əliyevin təməlini qoyduğu ekoloji tarazlığın bərpasına, ətraf mühitin mühafizəsinə yönələn siyasətin Prezident İlham Əliyev tərəfindən uğurla davam etdirilməsinin nəticəsində Azərbaycanda xüsusi mühafizə olunan təbiət ərazilərinin sayı ildən-ilə artmaqdadır.
Tam inamla demək mümkündür ki, ölkəmizdə artıq nəsli kəsilməkdə olan bir çox flora və fauna növləri bərpa edilmiş, bizi əhatə edən təbii varlıqlara münasibət köklü surətdə dəyişmişdir. Respublikamızda son 10 ildə 9 milli park yaradılmış və hazırda xüsusi mühafizə olunan təbiət əraziləri Azərbaycan ərazisinin 10,3 faizini təşkil edir.
Azərbaycan Respublikası Prezidentinin Xaçmaz rayonunun inzibati ərazisində Samur-Yalama Milli Parkının yaradılmasını nəzərdə tutan 2012-ci il 5 noyabr tarixli Sərəncamı bu prosesin davamlı olmasının bariz göstəricisidir.
AZƏRTAC xəbər verir ki, bu barədə Ekologiya və Təbii Sərvətlər Nazirliyinin bioloji müxtəlifliyin qorunması və xüsusi mühafizə olunan təbiət ərazilərinin inkişafı departamentinin direktoru Vaqif Cavadov bildirmişdir.
Departamentin direktoru qeyd etmişdir ki, dövlətimizin başçısının ekoloji sahədə verdiyi sərəncam və göstərişlərin vaxtında və yerində icra edilməsi nəzərəçarpacaq nəticələrə gətirib çıxarmışdır. Ölkəmizdə artıq nəsli kəsilməkdə olan bir sıra növlərin öz arealında müşahidə edilməsinə başlanılmışdır. Nəsli kəsilməkdə olan və son 50 ildə görünməyən Qafqaz bəbirinin Zəngəzur və Hirkan milli parklarında qurulmuş fototələlərdə müşahidə edilməsi faktı uğurlu nəticələrdən xəbər verir. Bu faktlar son illərdə xüsusi mühafizə olunan təbiət ərazilərində flora və faunanın mühafizəsi tədbirlərinin gücləndirilməsinə, ekoloji maarifləndirmə işlərinin aparılmasına əyani sübutdur. Təəssüf ki, hələ də xüsusi mühafizə olunan təbiət ərazilərində tətbiq olunan xüsusi rejimlərə, qaydalara, normativlərə tabe olmaq istəməyənlər vardır. Ancaq departament Azərbaycan Respublikasının qanunları çərçivəsində tətbiq edilən norma və qaydaları pozanlara qarşı inzibati tədbirlər görür və bu işi qətiyyətlə davam etdirir. Mühafizə rejimini pozanlar cərimələnir, daxili qaydalara riayət etmək istəməyənlərə ciddi xəbərdarlıqlar olunur, buna məhəl qoymayanlar barəsində qara siyahılar tərtib edilir və məhdudiyyətlər qoyulur. Demək olar ki, ötən əsrin 80-ci illərinin sonu 90-cı illərinin əvvəllərində ölkəmizin təbiət ərazilərində baş verən xaos ETSN-in səyləri nəticəsində son illərdə tənzimlənmiş, bütün mühafizə olunan, o cümlədən yüksək dağlıq ərazilərində nəzarət-buraxılış sistemi tətbiq olunmuş, turistlərin davranışını tənzimləyən qaydalar qəbul edilmişdir.
V.Cavadov demişdir ki, bu cür inzibati mübarizə tədbirləri “Xüsusi mühafizə olunan təbiət əraziləri və obyektləri haqqında” Azərbaycan Respublikası Qanununun və Prezident İlham Əliyevin Fərmanı ilə təsdiqlənmiş milli parklar haqqında Əsasnamənin tələblərindən irəli gələn daxili qaydalar, təlimatlar və mühafizə normativləri çərçivəsində həyata keçirilir.
Departament direktoru bildirmişdir ki, sərbəst hərəkət hüququ verən digər ərazilərə bu qaydalar şamil edilmir. Qara siyahı da pozuculara qarşı tətbiq edilən tədbirlərdən biridir ki, adı bu siyahıda olanların xüsusi mühafizə altındakı ərazilərə giriş-çıxışı müvəqqəti məhdudlaşdırılır. Bu təcrübə əslində bütün dünyada mövcuddur.
Bu sahədə gələcək planlardan danışan V.Cavadov qeyd etmişdir ki, hazırda Cənubi Qafqazda ilk dəfə olaraq Zaqatala-Balakən biosfer rezervatının yaradılması istiqamətində işlər görülür və xüsusi mühafizə olunan təbiət ərazilərinin sahəsinin 14 faizə çatdırılması sahəsində tədbirlər həyata keçirilir.
Bölmənin digər xəbərləri
