Azərbaycanda fintexlər üçün “innovasiya hab”ı və ya “sandboks”lar yaradıla bilər
Bakı, 16 iyun, AZƏRTAC
Prezident İlham Əliyevin tapşırığı əsasında hazırlanan “2022-2026-cı illərdə sosial-iqtisadi inkişaf Strategiyası”nda rəqəmsal iqtisadiyyatın, o cümlədən, maliyyə texnologiyalarının tətbiqinin əhatə dairəsinin genişləndirilməsi nəzərdə tutulur.
AZƏRTAC xəbər verir ki, bunu İqtisadi İslahatların Təhlili və Kommunikasiya Mərkəzinin icraçı direktoru, iqtisad elmləri doktoru, professor Vüsal Qasımlı deyib.
O bildirib ki, maliyyə texnologiyalarının inkişafını rəqəmsal ödənişlər, rəqəmsal sərmayə, alternativ maliyyələşdirmə, rəqəmsal aktivlər və neo-bankçılıq istiqamətində təsnifləşdirmək olar. Azərbaycanda xüsusilə rəqəmsal ödənişlərin həcmi həndəsi silsilə ilə artır. 2021-ci ilə qədər rəqəmsal ödənişlərin həcminin ikiqat artması üçün cəmi iki il tələb olunurdusa, qarşıdakı dörd ildə Azərbaycanda rəqəmsal ödənişlərin daha iki dəfə artması proqnozlaşdırılır.
Maliyyə texnologiyalarının inkişafı açıq bankçılıqla əlaqədardır ki, burada da həm innovasiyaları, həm də riskləri nəzərə almaq lazımdır. Bu məsələlər Azərbaycanda “Açıq bankçılığın tətbiqi üzrə yol xəritəsi”ndə nəzərdə tutulur. Azərbaycanda tətbiqi proqramlaşdırma interfeysi üzrə (API) standartın hazırlanması və mərkəzləşdirilmiş API infrastrukturuna keçid maliyyə texnologiyalarının inkişafını daha da sürətləndirəcək. BankAPI infrastrukturunun yaradılması ilə startapların bank sektoruna inteqrasiyası təmin ediləcək.
“Azərbaycanda da beynəlxalq təcrübədən istifadə edərək fintexlər üçün əlverişli tənzimləyici mühit, o cümlədən, “innovasiya hab”ı və ya “sandboks”lar yaradıla bilər. Belə xüsusi tənzimləmə rejimində həm maliyyə texnologiyaları daha sürətlə inkişaf edir, həm də fintexlərin xidmətindən istifadə imkanı yaranır. Maliyyə savadlılığının artırılması və maliyyə mədəniyyətinin yüksəldilməsi də bu sahədə rəqəmsal transformasiyaya dəstək olacaq. Maliyyə texnologiyalarının tətbiqi iqtisadi səmərəliliyi artırır, rəqabəti dəstəkləyir, müştəri məmnuniyyətinə səbəb olur və maliyyə inklüzivliyini yüksəldir, beləliklə, davamlı inkişafa töhfə verir. Fintex həllərinin tətbiqi Azərbaycanın bank sektorunun rəqəmsal transformasiyası və mövqelərini qoruması üçün əsas şərtdir. Maliyyə texnologiyaları üzrə yeni yol xəritəsi bu sahədə əsas çağırış və perspektivləri aydınlaşdırmaqla strateji baxışı və inkişaf istiqamətlərini müəyyənləşdirəcək”, - deyə V.Qasımlı qeyd edib.
Bölmənin digər xəbərləri
