“AZƏRBAYCANDA KONSTİTUSİYA ƏDALƏT MÜHAKİMƏSİNİN İNKİŞAFI” MÖVZUSUNDA KEÇİRİLƏN OLİMPİADANIN QALİBLƏRİ MÜKAFATLANDIRILMIŞLAR
AZƏRTAC xəbər verir ki, iyulun 7-də Konstitusiya Məhkəməsinin mərkəzi aparatında bu qurumun 10 illiyinə həsr olunmuş “Azərbaycanda konstitusiya ədalət mühakiməsinin inkişafı” mövzusunda keçirilən olimpiadanın qaliblərinin mükafatlandırılması mərasimi keçirilmişdir.
Konstitusiya Məhkəməsinin konstitusiya hüququ şöbəsinin müdiri, olimpiadanın təşkilat komitəsinin sədri Dürdanə Məmmədova olimpiadanın keçirilməsi və gedişi haqqında ətraflı məlumat vermişdir. Bildirmişdir ki, olimpiadaya respublikanın yeddi ali təhsil müəssisəsinin tələbələri tərəfindən 10 məqalə təqdim olunmuşdur.
Konstitusiya Məhkəməsinin sədri Fərhad Abdullayev iştirakçıları məhkəmənin yaranmasının 10-cu ildönümü münasibətilə təbrik etmiş, olimpiadanın gənclərin hüquqi tərbiyəsinin yüksəldilməsinə, ölkəmizin qanunvericilik aktları haqqında biliklərinin artırılmasına şərait yaradacağına əmin olduğunu bildirmişdir.
Konstitusiya Məhkəməsində hüquq olimpiadasının keçirilməsinin ənənəyə çevrildiyini deyən sədr bildirmişdir ki, bu, gənclərin gələcək hüquqi tərbiyəsi, hüquq elmlərini mənimsəməsi üçün çox gözəl bir imkandır.
Vurğulanmışdır ki, 1998-ci il iyulun 14-də Azərbaycanda Konstitusiya Məhkəməsi təsis edilmişdir. Konstitusiya Məhkəməsi ötən 10 il ərzində insan hüquq və azadlıqlarının müdafiəsi sahəsində bir çox işlər görmüş, hüquq normalarının Konstitusiyaya uyğunluğu və şərh edilməsi ilə bağlı bir çox qərarlar vermişdir.
Müstəqil Azərbaycanın demokratik dəyərlərə əsaslanan Əsas Qanununun qəbul olunmasında ümummilli liderimiz Heydər Əliyevin tarixi xidmətlərini yada salan Fərhad Abdullayev vurğulamışdır ki, 1998-ci ildə təsis edilmiş Konstitusiya Məhkəməsinə Prezident İlham Əliyev tərəfindən daim yüksək qiymət verilir.
Münsiflər heyətinin üzvləri - Konstitusiya Məhkəməsinin hakimi Ələddin Sultanov və Məhkəmə Aparatı rəhbərinin müavini Şahin Rüstəmov olimpiadanın əhəmiyyətindən bəhs etmiş, tələbələrə yeni nailiyyətlər arzulamışlar.
Təhsil nazirinin müavini Elmar Qasımov, gənclər və idman nazirinin müavini İntiqam Babayev iştirakçıları Konstitusiya Məhkəməsinin yaranmasının 10 illiyi münasibətilə təbrik edərək, müvəffəqiyyətlə başa çatmış olimpiadada iştirak edənlərin gələcəyin görkəmli hüquqşünasları olacaqlarına əminliklərini söyləmişlər.
Bildirilmişdir ki, Konstitusiya Məhkəməsi gənclərimizin maarifləndirilməsi, onların hüquqi biliklərə yiyələnmələri istiqamətində mühüm işlər görür. Bütün bu işlər vətəndaş cəmiyyətinin qurulmasına və hüquqi dövlətin möhkəmlənməsinə xidmət edir.
Sonra “Azərbaycanda konstitusiya ədalət mühakiməsinin inkişafı”
mövzusunda keçirilən olimpiadanın qalibləri mükafatlandırılmışlar. Bakı Dövlət Universitetinin və Milli Aviasiya Akademiyasının tələbələri birinci dərəcəli diploma, 2-ci yerə Azərbaycan Respublikasının Prezidenti yanında Dövlət İdarəçilik Akademiyasının, Qafqaz Universitetinin tələbələri, 3-cü yerə isə Qərb Universitetinin tələbəsi layiq görülmüşlər. Digər 5 nəfər də diplomla təltif olunmuşdur.
Konstitusiya Məhkəməsinin sədri mərasimə yekun vurmuş, qaliblərə müvəffəqiyyət arzulamışdır.
Bölmənin digər xəbərləri
