Azərbaycanda rus dilinin öyrənilməsinə böyük diqqət yetirilir
Bakı, 11 iyun, AZƏRTAC
Rusiya Federasiyasının ölkəmizdəki səfirliyində səfir Mixail Boçarnikov mətbuat konfransı keçirib. Tədbir iyunun 12-də qeyd edilən Rusiya Gününə həsr olunub.
AZƏRTAC xəbər verir ki, jurnalistlərlə görüşdə çıxış edən M.Boçarnikov Rusiya Federasiyasının son illərdə qazandığı nailiyyətlərdən, həmçinin ölkə hökumətinin qarşısında duran vəzifələrdən danışıb. O, Rusiyada yüksək iqtisadi artımın müşahidə olunduğunu, əhalinin həyat səviyyəsinin artdığını, qonşu dövlətlərlə əlaqələrin genişləndiyini qeyd edib. Səfir Rusiya xalqının koronavirus pandemiyası səbəbindən yaranan problemləri şərəf və cəsarətlə aradan qaldıracağına əmin olduğunu bildirib.
M.Boçarnikov çıxışında Böyük Vətən müharibəsində qələbənin 75 illiyinə toxunaraq, onu müharibədə iştirak edən ölkələrin həyatında mühüm hadisə adlandırıb. Diplomat Azərbaycan Respublikasının Prezidenti İlham Əliyevin veteranlara göstərdiyi qayğı və diqqəti yüksək qiymətləndirib.
Səfir vurğulayıb ki, Azərbaycanda rus dilinin öyrənilməsinə böyük diqqət yetirilir, rus mədəniyyətinə xüsusi maraq göstərilir. Buna Rusiya və Azərbaycanın dövlət başçıları arasındakı dostluq və tərəfdaşlıq münasibətləri zəmin yaradır.
Mixail Boçarnikov daha sonra jurnalistlərin suallarını cavablandırıb.
Bölmənin digər xəbərləri
