Baş nazir İlham Əliyev səfər zamanı Türkiyənin yüksək vəzifəli rəsmi şəxsləri ilə bir sıra görüşlər keçirəcək, hər iki ölkəni maraqlandıran bəzi məsələlər barədə müzakirələr aparacaqdır.

***

AZƏRBAYCANIN BAŞ NAZİRİ İLHAM ƏLİYEVİN TÜRKİYƏYƏ İŞGÜZAR SƏFƏRİ

Azərbaycan Respublikasının Baş naziri İlham Əliyev Türkiyə Respublikasının Baş naziri Rəcəb Tayyib Ərdoğanın dəvəti ilə sentyabrın 8-də qardaş ölkəyə işgüzar səfərə gəlmişdir. Hər iki ölkənin dövlət bayraqları ilə bəzədilmiş Ankaranın Esenboğa hava limanında Baş nazir İlham Əliyevi Türkiyənin energetika və təbii ehtiyatlar naziri Hilmi Gülər, Ankara valisi Yəhya Gur, Azərbaycanın Türkiyədəki səfiri Məmməd Əliyev, Türkiyənin Bakıdakı səfiri Əhməd Ünal Çeviköz, ölkəmizin İstanbuldakı baş konsulu İbrahim Yaqubov və digər rəsmi şəxslər qarşıladılar.X X X Baş nazir İlham Əliyev həmin gün Türkiyə Respublikasının banisi Mustafa Kamal Atatürkün məqbərəsini ziyarət etdi. O, böyük öndərin xatirəsinə ehtiram əlaməti olaraq, məzarın önünə əklil qoydu, xatirə kitabına ürək sözlərini yazdı. Sentyabrın 8-də Azərbaycanın Baş naziri İlham Əliyev Türkiyə Baş nazirinin müavini, xarici işlər naziri Abdullah Gül, Türkiyə Respublikasının Prezidenti Əhməd Necdət Sezər ilə görüşdü. Azərbaycanın Baş naziri İlham Əliyevin qardaş ölkəyə səfəri çərçivəsində sonuncu görüşü Türkiyənin Baş naziri Rəcəb Tayyib Ərdoğanla oldu. Hökumət başçılarının təkbətək söhbətindən sonra görüş nümayəndə heyətlərinin iştirakı ilə geniş tərkibdə davam etdirildi. Sonra Azərbaycan Respublikası hökuməti ilə Türkiyə Respublikası hökuməti arasında qarşılıqlı viza tətbiqi haqqında saziş imzalandı. Sənədi Azərbaycan tərəfdən Baş nazirin müavini Abid Şərifov, Türkiyə tərəfdən Baş nazirin müavini, xarici işlər naziri Abdullah Gül imzaladılar. İmzalanma mərasimindən sonra Azərbaycan və Türkiyənin baş nazirləri birgə mətbuat konfransı keçirdilər. Həmin gün axşam Türkiyə Baş nazirinin iqamətgahında Azərbaycanın Baş naziri İlham Əliyevin şərəfinə rəsmi şam yeməyi verildi. Səfər çərçivəsində dostluq və mehribanlıq şəraitində keçən görüşlərdə Azərbaycan ilə Türkiyə arasında bütün sahələrdə əməkdaşlığın daha da genişləndirilməsi və möhkəmləndirilməsi, o cümlədən Bakı-Tbilisi-Ceyhan neft və Bakı-Tbilisi-Ərzurum qaz kəməri layihələrinin həyata keçirilməsi, Ermənistan-Azərbaycan, Dağlıq Qarabağ münaqişəsinin həlli, habelə ölkələrimizi maraqlandıran bir sıra başqa məsələlər barədə geniş fikir mübadiləsi aparılmışdır. Baş nazir İlham Əliyev həmin gün gecə Bakıya qayıtmışdır.

***

TACİKİSTAN RESPUBLİKASININ PREZİDENTİ ZATİ-ALİLƏRİ CƏNAB EMOMƏLİ RƏHMONOVA

Hörmətli Emoməli Şaripoviç,

Tacikistan Respublikasının milli bayramı – Müstəqillik günü münasibətilə Sizi və dost Tacikistan xalqını ürəkdən təbrik edirəm. Tacikistan müstəqilliyin çətin yollarından keçərək bu gün siyasi sabitliyə, iqtisadi yüksəlişə, demokratik dəyişikliklərə nail olmuşdur. Əminəm ki, Azərbaycan ilə Tacikistan arasındakı çoxəsrlik tarixi ənənələri olan dostluq və əməkdaşlıq münasibətləri bu gün yeni məzmun kəsb edərək xalqlarımızın mənafeyi, regionumuzda sülh və təhlükəsizlik naminə daim inkişaf edəcəkdir. Hörmətli Emoməli Şaripoviç, Sizə möhkəm cansağlığı, işlərinizdə uğurlar, dost Tacikistan xalqına əmin-amanlıq və firavanlıq arzulayıram.

Hörmətlə,

Heydər Əliyev,

Azərbaycan Respublikasının Prezidenti.

1 sentyabr 2003-cü il.

***

KOREYA XALQ DEMOKRATİK RESPUBLİKASI MÜDAFİƏ KOMİTƏSİNİN SƏDRİ ZATİ-ALİLƏRİ CƏNAB KİM ÇEN İRƏ

Hörmətli cənab Sədr,

Ölkənizin milli bayramı - Koreya Xalq Demokratik Respublikasının yaranması günü münasibətilə Sizi və xalqınızı ürəkdən təbrik edirəm.Ümidvaram ki, ölkələrimiz arasında dostluq və əməkdaşlıq münasibətləri xalqlarımızın rifahı naminə daim inkişaf edəcəkdir.Sizə möhkəm cansağlığı, işlərinizdə uğurlar, ölkənizə əmin-amanlıq və firavanlıq arzulayıram.

Hörmətlə,

Heydər Əliyev,

Azərbaycan Respublikasının Prezidenti.

1 sentyabr 2003-cü il.

***

AZƏRBAYCAN RESPUBLİKASININ BAŞ NAZİRİ CƏNAB İLHAM ƏLİYEVƏ

Hörmətli İlham Heydər oğlu!

Azərbaycan Milli Məclisinin qərarını böyük məmnunluqla alqışlayır və Sizi belə yüksək vəzifəyə - ölkənin Baş naziri vəzifəsinə təsdiq olunmağınız münasibətilə təbrik edirəm. Əminəm ki, bu, müdrik Prezident Heydər Əliyevin on illər ərzində yaratdığı xəttin davam etdirilməsinə kömək edəcəkdir. Gürcüstanda dərindən inanırlar ki, Siz Dahi Atanızın layiqli varisisiniz və Azərbaycanın nurlu gələcəyi Sizinlə bağlıdır.

Dərin hörmətlə və ən xoş arzularla,

Nikolay Lekişvili

Gürcüstan parlamentinin deputatı.

***

AZƏRBAYCAN RESPUBLİKASININ BAŞ NAZİRİ CƏNAB İLHAM ƏLİYEVƏ

Hörmətli İlham Heydər oğlu!

Yüksək dövlət vəzifəsinə - Azərbaycanın Baş naziri təyin olunmağınız münasibətilə Sizi Moskva hökuməti adından və şəxsən öz adımdan ürəkdən təbrik edirəm. Əminəm ki, Azərbaycan Prezidentinin apardığı ölçülüb-biçilmiş və konstruktiv siyasət, əvvəllər olduğu kimi, yenə də əməli məzmunla – Moskvanın da özünü aid etdiyi tərəfdaşlarla əməkdaşlıqla fəal surətdə dolğunlaşacaqdır. Ümidvaram ki, çoxşaxəli və qarşılıqlı surətdə faydalı əlaqələrin inkişaf etdirilməsi haqqında əvvəllər əldə olunmuş razılaşmaların həyata keçirilməsi sahəsində birgə səylərimiz iqtisadi firavanlığın möhkəmlənməsi, sakinlərimizin rifahının yüksəlməsi yolunda irəliləyişə yeni təkan verəcəkdir. Hörmətli İlham Heydər oğlu, Sizə möhkəm cansağlığı, məsul işinizdə böyük uğurlar, dost Azərbaycan xalqına isə sülh və tərəqqi arzulayıram.

Yuri Lujkov,

Moskva şəhərinin meri.

Moskva, 7 avqust 2003-cü il.

***

AZƏRBAYCAN RESPUBLİKASININ BAŞ NAZİRİ CƏNAB İLHAM ƏLİYEVƏ

Zati-aliləri,

Azərbaycan Respublikasının Baş naziri vəzifəsinə təyin olunmağınız münasibətilə Misir xalqı, hökuməti adından və şəxsən öz adımdan Sizə ən səmimi təbriklərimi çatdırmaqdan çox məmnunam. Cənab Baş nazir, əminəm ki, ölkələrimiz arasında mövcud olan gözəl ikitərəfli münasibətlər gələcəkdə xalqlarımızın rifahı və tərəqqisi naminə daha da möhkəmlənəcək və əməkdaşlığımız genişlənəcəkdir. Eyni zamanda, bu fürsətdən istifadə edərək, yeni işinizdə Sizə böyük uğurlar, dost Azərbaycan xalqına isə tərəqqi və əmin-amanlıq arzulayıram. Zati-aliləri, ən yüksək hörmət və ehtiramımı qəbul etməyinizi xahiş edirəm.

Doktor Atif Ubeyd,

Misir Ərəb Respublikasının Baş naziri.

***

AZƏRBAYCAN RESPUBLİKASININ BAŞ NAZİRİ CƏNAB İLHAM ƏLİYEVƏ

Zati-aliləri,

Azərbaycan Respublikasının Baş naziri vəzifəsinə təyin olunmağınız münasibətilə Sizə ən səmimi təbriklərimi çatdırmaqdan böyük şərəf hissi duyuram. İllər boyu ölkələrimiz arasında dostluq münasibətləri müxtəlif sahələrdə inkişaf etmişdir. Çox ümidvaram ki, fəaliyyətiniz dövründə bu səmimi münasibətlər xalqlarımızın rifahı naminə daha da canlanacaqdır. Zati-aliləri, ən yüksək hörmət və ehtiramımı qəbul etməyinizi xahiş edir və gələcək işlərinizdə Sizə ən xoş diləklərlə böyük uğurlar arzulayıram.

Meqavati Sukarnoputri,

İndoneziya Respublikasının Prezidenti.

***

XALQ YAZIÇISI RƏSUL HƏMZƏTOVA

Çox hörmətli Rəsul Həmzətoviç!

Sizi – müasir ədəbiyyatın görkəmli xadimini 80 illik yubileyiniz münasibətilə təbrik edir, Sizə möhkəm cansağlığı və firavanlıq arzulayıram. İnsanlara hədsiz məhəbbətlə dolu, incə lirizm və milli kolorit aşılanmış bütün yaradıcılığınız dərin fəlsəfi məna və məzmun daşıyır. Sizin yaradıcılığınız həm özünün rəngarəngliyi ilə, həm də zəmanənin sosial problemlərini böyük söz sənətinin yüksək tələbləri ilə əlaqələndirməsi baxımından insanların qəlbini fəth edir. Poeziyanızda təcəssümünü tapan ümumbəşəri dəyərlər belə mürəkkəb dövrdə yaşayan bizim hamımızı, şübhəsiz ki, bir-birinə yaxınlaşdırır, mədəniyyətlərin və xalqların dialoquna təkan verir. Artıq tarixə qovuşmuş XX əsri Sizin yaradıcılığınızı, şerlərinizin emosional vüsətini nəzərə almadan təsəvvür etmək çətindir. Böyük humanizm ruhu ilə aşılanmış poeziyanız, əlbəttə ki, Sizin bənzərsiz şəxsiyyətinizin inikasıdır. Avar xalqı Sizinlə, eləcə də, bir çox digər xalqların da Sizi öz doğması kimi qəbul etməsi ilə haqlı olaraq fəxr edir. Bizim ölkəmizdə Sizin yaradıcılığınız müasir insanın mənəvi aləmi haqqında təsəvvürlərimizi zənginləşdirmiş parlaq fenomen kimi qiymətləndirilir. Pərəstişkarlarınızın məhəbbət və ehtiramı xeyli dərəcədə həm də onunla əlaqədardır ki, Sizin bir çox şerlərinizdə Azərbaycanla və onun paytaxtı Bakı ilə bağlı ülvi hisslər öz əksini tapmışdır. Eyni zamanda, Azərbaycanın mədəniyyət xadimləri də Sizin yaradıcılığınıza dəfələrlə müraciət edərək, ondan ilham almışlar. Əziz Rəsul! Xalqlarımızın mənəvi birliyi Sizin bütün poeziyanızda gözəl əks olunmuşdur. Siz Azərbaycan və Dağıstan xalqları arasında dostluğun və əməkdaşlığın möhkəmlənməsi üçün xeyli səylər göstərmisiniz. Ümidvaram ki, Sizin parlaq istedadınız və çox böyük fitri müdrikliyiniz bundan sonra da bizim hamımızı sevindirəcəkdir.

Ən xoş arzularla,

Heydər Əliyev,

Azərbaycan Respublikasının Prezidenti.

8 sentyabr 2003-cü il.