AZƏRBAYCANIN DÜNYA TİCARƏT TƏŞKİLATINA ÜZV QƏBUL OLUNMASI İSTİQAMƏTİNDƏ DANIŞIQLAR UĞURLA DAVAM ETDİRİLİR
Xarici İşlər Nazirliyinin mətbuat mərkəzindən AZƏRTAC-a bildirmişlər ki, nümayəndə heyəti səfər müddətində Türkiyə, Yaponiya, Moldova və Kanadanın DTT-dəki təmsilçiləri ilə ikitərəfli, ABŞ, Avropa İttifaqı, Avstraliya, Kanada, Malayziya və qurumun digər üzvlərinin nümayəndələri ilə isə kənd təsərrüfatı məsələlərinə dair çoxtərəfli danışıqlar aparmışdır.
2005-ci ilin iyununda Cenevrədə Azərbaycan ilə Moldova arasında başlanmış müzakirələrin davamı olaraq, ölkəmizin əmtəələr və xidmətlər bazarına əlverişli şərtlər əsasında girməsi məsələlərinə dair ikitərəfli danışıqlar uğurla yekunlaşmışdır. Ölkədaxili bəzi proseduralar həyata keçirildikdən sonra DTT qaydalarına uyğun olaraq, Azərbaycan ilə Moldova arasında müvafiq ikitərəfli protokol imzalanacaqdır.
Martın 30-da Cenevrədə Gürcüstanla aparılan ikitərəfli danışıqlar da uğurla yekunlaşmışdır. Bu istiqamətdə DTT-nin digər üzvləri ilə də ikitərəfli danışıqlar davam etdiriləcəkdir.
Kənd təsərrüfatı ilə əlaqədar aparılmış çoxtərəfli danışıqlarda isə DTT üzvlərinin suallarına aydınlıq gətirilmiş və Azərbaycanın əlverişli şərtlərlə quruma üzvlüyə qəbulu məsələsi ətrafında müzakirələr aparılmışdır. Tərəflər danışıqların davam etdirilməsi barədə razılığa gəlmişlər.
Bölmənin digər xəbərləri
