AZƏRBAYCANIN MƏDƏNİYYƏT XADİMLƏRİNƏ DAĞISTAN RESPUBLİKASININ FƏXRİ ADLARI VERİLMİŞDİR
AZƏRTAC xəbər verir ki, iyunun 27-də Yaxt-klubda keçirilmiş mərasimdə Dağıstan Prezidenti Muxu Əliyev Azərbaycanın mədəniyyət xadimlərinə Rusiya Federasiyasının bu subyektinin xalq artisti və əməkdar artisti fəxri adlarını vermişdir.
Dağıstan rəhbəri ölkəmizə səfərinin yekunları barədə danışarkən bildirmişdir ki, respublikamızın rəhbərləri ilə keçirilmiş görüşlərdə iqtisadi, elmi-texniki və mədəni əlaqələrin inkişaf etdirilməsi məsələlərinə dair geniş fikir mübadiləsi aparılmışdır. Dağıstan ilə Azərbaycanı ta qədimdən təkcə mehriban qonşuluq münasibətləri deyil, həm də qardaşlıq telləri bağlayır. Muxu Əliyev vurğulamışdır ki, bu amili özünün indiki səfəri zamanı bir daha yəqin etmişdir. Ən başlıcası, bu görüşlər göstərdi ki, ikitərəfli əlaqələrin daha da yaxşılaşdırılması üçün böyük potensial vardır.
Humanitar sahədə əməkdaşlıq barədə söhbət açan Muxu Əliyev qeyd etmişdir ki, Azərbaycan bu sahədə böyük uğurlar qazanmışdır. Dağıstan Prezidenti Azərbaycanın mədəniyyət xadimlərini salamlayaraq onlara fəxri adların vəsiqələrini təqdim etmişdir.
İlhamə Quliyeva, Zaur Rzayev, Azər Zeynalov, Elza İbrahimova və Aftandil İsrafilov Dağıstanın xalq artisti, Ədalət Şükürov, Bəsti Bəkirova, Bəxtiyar Qantayev, Şərbət Rzaquliyev əməkdar artist adına layiq görülmüşlər.
######
Bölmənin digər xəbərləri
