Azərbaycanın Türkiyəyə yardım kampaniyası qardaşlıq və həmrəylik örnəyidir
Bakı, 14 fevral, AZƏRTAC
“Dostlar dar gündə tanınar” deyərlər. Bu ifadə hər kəs üçün doğrudur, keçərlidir. Lakin Azərbaycan və türk xalqlarının münasibətləri üçün bu zərb-məsəl dar gəlir. Çünki xalqlarımızın bir-birinə bağlılığı iki dost arasındakı münasibətlər çərçivəsindən daha geniş, daha doğmadır. Bu doğmalıq sevincini öz sevinci, kədərini öz kədəri kimi qəbul edən iki qan qardaşının yaxınlığından əmələ gəlir. Sadəcə zahiri əlamətlərdə özünü göstərmir, eyni zamanda, hər iki xalq tərəfindən bir ictimai şüuraltı səviyyəsində hiss olunur.
Bunu AZƏRTAC-a açıqlamasında Beynəlxalq Türk Akademiyasının prezidenti akademik Şahin Mustafayev söyləyib. O bildirib ki, hər zaman Azərbaycan xalqının sonadək yanında olan, dərdini bölüşən, mübarizəsində həmrəy olan, Vətən müharibəsində şanlı Qələbəmiz üçün bizə əlindən gələn yardımları göstərən məhz türk xalqı və Türkiyə dövləti oldu. Biz hər zaman qardaş millətin dərdimizə və sevincimizə şərik olduğunu duyurduq. Bu səmimiyyət, bu doğmalıqdır ki, hər il 20 Yanvar günü Şəhidlər xiyabanını ziyarət edən yüz minlərlə azərbaycanlı 1918-ci ildə Azərbaycanın azadlığı və müstəqilliyi uğrunda canını fəda etmiş və eyni məkanda torpağa tapşırılmış türk əsgərinin də müqəddəs abidəsini eyni hissiyyatla ziyarət edir. Azərbaycan insanını Anadolu əsgərinin şərəfinə ucaldılmış abidə üstünə əklillər qoymağa, onu çiçəklərlə bəzəməyə sövq edən həmin hisslər onu qardaşının ağır günündə yardımına tələsməyə, əlindən gələn köməyi göstərməyə, acısını bölüşərək yaralarını sarımağa da sövq etdi.
Bu yaxınlarda Türkiyədə on minlərlə insanın həyatını alan, olduqca böyük dağıntılara səbəb olan dəhşətli zəlzələ yalnız Türkiyənin deyil, Azərbaycan xalqının da qəlbini sarsıtdı. Sanki bu faciə təbiətin türk xalqını sınağa çəkdiyi ən ağır imtahanlardan biri idi. Məhz belə zamanlarda türk millətinin dəyanəti, ləyaqəti və dözümlülüyü özünü büruzə verir. Bu hadisədə hamımız həm də Azərbaycan xalqının şəvqətinin, qardaşlıq hisslərinin, yardımsevərliyinin bir daha şahidi olduq. Bu ağır günlərdə yardımsevərliyin ən gözəl nümunələrindən birini Azərbaycanın Birinci vitse-prezidenti Mehriban Əliyeva çox yüksək şəkildə nümayiş etdirdi. Mehriban xanım Türkiyədə baş vermiş zəlzələdən zərər çəkənlərə humanitar yardımla bağlı paylaşımında bunu xüsusi qeyd edib: “Hər zaman birlik və həmrəylik nümayiş etdirərək bir-birinə kömək etməyə hazır olmaq, əl-ələ verərək çətinliklərdən və sınaqlardan birlikdə üzüağ çıxmaq Azərbaycan xalqının ən gözəl xüsusiyyətlərindən biridir”. Bu sözlər Mehriban xanım Əliyeva tərəfindən qardaş türk xalqına köməyə tələsən bütün həmvətənlərimizə ünvanlanıb. Mehriban xanımın rəhbərlik etdiyi Heydər Əliyev Fondu zəlzələ bölgəsində zərərçəkənlərə kömək əlini uzadan ilk təşkilatlardan biri oldu. Bu fəaliyyətin nəticəsində neçə məsum həyat qurtarıldı, neçə sönmüş gözlərdə yenidən ümid işığı parıldadı. Heç şübhəsiz, bu fədakarlıq və təmənnasız yardım nümunəsi birləşmə yolunda inamla addımlayan türk dünyası üçün gələcəkdə də ən gözəl qardaşlıq və həmrəylik örnəyi olacaq”,- deyə akademik qeyd edib.
Bölmənin digər xəbərləri
