Azərbaycanın və Avropa ölkələrinin gəncləri arasında əməkdaşlıq əlaqələri möhkəmlənir
Bakı, 18 noyabr (AZƏRTAC). Azərbaycan Respublikasının Prezidenti yanında Gənclər Fondunun maliyyə dəstəyi ilə reallaşacaq “Azərbaycanın və Avropa ölkələrinin gəncləri arasında əməkdaşlığın inkişafı” adlı beynəlxalq layihənin hazırlıq işləri yekunlaşmışdır.
Layihə “Azərbaycan - Avropa Gənclərinin Əməkdaşlığı” İctimai Birliyi və “Benilüks” Azərbaycan Konqresinin Gənclər Təşkilatı tərəfindən dekabrın 13-dən 18-dək Bakı şəhərində və Quba rayonunda həyata keçiriləcəkdir.
İctimai birlikdən AZƏRTAC-a bildirmişlər ki, layihənin əsas məqsədi Avropada və Azərbaycanda fəaliyyət göstərən gənclər təşkilatları arasında əlaqələrin inkişaf etdirilməsi və yeni əməkdaşlıq istiqamətlərinin müzakirə edilməsidir.
Layihədə İtaliya, Niderland, İspaniya, Polşa, Estoniya, Slovakiya, Gürcüstan və Türkiyədən 15 nəfər gənc iştirak edəcəkdir. Layihə çərçivəsində müvafiq gənclər və tələbə təşkilatları ilə görüşlər nəzərdə tutulmuşdur. Eyni zamanda, “Benilüks” Azərbaycan Konqresinin Gənclər Təşkilatı ilə Avropada fəaliyyət göstərən gənclər təşkilatlarının əməkdaşlıq perspektivləri müzakirə olunacaqdır.
Bununla yanaşı, qonaqlar Quba soyqırımı məzarlığı ilə tanış olacaq, həmçinin regionun tarixi və mədəni abidələrinə ekskursiya edəcəklər.
Bölmənin digər xəbərləri
