AZƏRBAYCANIN VƏ BOLQARISTANIN ALİ MƏKTƏBLƏRİ ARASINDA ƏMƏKDAŞLIQ HAQQINDA SAZİŞ İMZALANMIŞDIR
Bakı Slavyan Universitetinin bir qrup müəllimi bolqar həmkarlarının dəvəti ilə bu günlərdə Sofiyada olmuşdur. Azərbaycan alimləri yepiskop Konstantin Preslavski adına Şumen Universitetində və Kliment Oxridski adına Sofiya Universitetində çoxsaylı görüşlər keçirmiş və danışıqlar aparmışlar. Bu barədə AZƏRTAC-ın müxbirinə BSU-nun rus filologiyası fakültəsinin dekanı, professor Bella Musayeva məlumat vermişdir.
Danışıqların yekunu olaraq, Bakı Slavyan Universiteti ilə Bolqarıstanın bu ali məktəbləri arasında əməkdaşlıq və birgə fəaliyyət haqqında saziş bağlanmışdır.
Humanitar elmlər üzrə mütəxəssislər hazırlamaq məqsədi ilə tərəflər informasiya, elmi tədqiqat və tədris-pedaqoji sahələrdə əməkdaşlıq etmək, birgə elmi məqalə topluları buraxmaq, dil və ölkəşünaslıq təcrübəsi keçmək üçün tələbə mübadiləsi, rus dili və ədəbiyyatına dair mühazirələr, xüsusi kurslar oxunmaq və məşğələlər aparmaq üçün bir-birlərinə müəllimlər göndərmək, üç universitet tərəfindən təşkil olunacaq yubiley tədbirlərində və konfranslarda iştirak etmək barədə razılığa gəlmişlər.
Professor B.Musayeva demişdir:
Bolqarıstana səfərimiz Slavyan Universitetinin rektoru, professor Kamal Abdullayevin təşəbbüsü ilə olmuşdur. Bu yaxınlarda bizim ali məktəbə Şumen Universitetinin rəhbərliyindən məktub gəlmişdi. Bolqar həmkarlarımız rus filologiyası və slavyanşünaslıq sahəsində BSU mütəxəssislərinin böyük təcrübəsini nəzərə alaraq, bir qrup müəllimimizin məsləhət vermək üçün Şumen şəhərinə ezam olunmasını təklif etmişdilər. Sonra Sofiya Universitetindən də belə bir təklif aldıq.
Mən və BSU-nun rus dili kafedrasının müdiri, dosent İrina Əliyeva Sofiyaya gəldikdən sonra Bolqarıstan Respublikasının sabiq prezidenti, BSU-nun fəxri doktoru cənab Jelyu Jelevlə görüşdük. O, Bakıya səfərindən və Azərbaycan Respublikasının Prezidenti möhtərəm Heydər Əliyev ilə görüşündən aldığı dərin təəssüratını bizimlə bölüşdü. O, müasir dünyanın mənəvi həyatındakı meyllərin başa düşülməsində dövlətimizin başçısının rolunu yüksək qiymətləndirdi. Cənab Jelyu Jelev bildirdi ki, azərbaycanlıların dini dözümlülüyü və artistlərimizin yüksək ifaçılıq məharəti ona böyük təsir bağışlamışdır. Onun fikrincə, bütün bunlar və zəngin təbii sərvətlər Azərbaycanın parlaq gələcəyi üçün yaxşı zəmindir. Biz Bolqarıstanın sabiq prezidenti ilə ali məktəblərimiz arasında əməkdaşlığın formaları barədə də fikir mübadiləsi apardıq. O, hədiyyə olaraq bizə tədris vəsaitləri və videokassetlər verdi.
Bundan sonra biz Şumen şəhərinə gedərək, Universitetin rəhbərliyi ilə görüşdük, burada oxuyan azərbaycanlı tələbələrin yaşayışı, məişəti və təhsil şəraiti ilə tanış olduq. Sonra universitetdə görkəmli rus şairi Sergey Yeseninə həsr olunmuş bədii gecə keçirildi. Gecədə mən “Yesenin və Azərbaycan” mövzusunda məruzə etdim. Bakı Slavyan Universiteti haqqında apardığımız sənədli film də tələbələrdə böyük maraq doğurdu. Sonra BSU ilə Konstantin Preslavski adına Şumen Universiteti arasında birgə fəaliyyət və əməkdaşlıq haqqında müqavilə imzalandı.
Professor Bella Musayevanın fikrincə, ölkələrimizin ali məktəblərinin bu təşəbbüsü Azərbaycan və Bolqarıstan ziyalılarının və gənclərinin yüksək mənəvi və siyasi səviyyəsini göstərir. Şübhəsiz, Bakı Slavyan Universiteti ilə Sofiya və Şumen universitetləri arasınada sıx və səmimi əlaqələr rusşünaslıq, bolqarşünaslıq və azərbaycanşünaslıq sahəsində əməkdaşlıq üçün böyük perspektivlər açır.
Bütün bunlar yanlış dini təssübkeşlikdən azad və başqa mədəniyyətlərə açıq olan sivilizasiyalı Avropa ölkəsi kimi Azərbaycan haqqında müsbət rəy yaradır.
Bölmənin digər xəbərləri
