Azərbaycanın və Tacikistanın daxili işlər nazirlikləri arasında əməkdaşlıq məsələləri müzakirə edilib
Düşənbə, 27 aprel, AZƏRTAC
Azərbaycanın Tacikistandakı səfiri Həsən Məmmədzadə bu ölkənin daxili işlər naziri, general-polkovnik Ramazon Raximzoda ilə görüşüb.
AZƏRTAC xəbər verir ki, görüşdə iki ölkə arasında siyasi sahədə səmimi dostluq münasibətlərinin iqtisadi və ticari əlaqələrin daha yüksək səviyyəyə çatdırılmasına töhfəsi qeyd olunub.
Söhbət zamanı MDB Daxili İşlər Nazirləri Şurasının növbəti iclasının Azərbaycanda keçirilməsi və Şurada sədrliyin ölkəmizə keçəcəyi ilə bağlı müzakirələr aparılıb.
Səfir müstəqilliyimizin ilk illərində üzləşdiyimiz çətinliklər, keçilən çətin və eyni zamanda, şərəfli yol barədə qısa məlumat verib. Qeyd olunub ki, müstəqillik dövründə ulu öndər Heydər Əliyevin Azərbaycana rəhbərlik etdiyi ilk illərdə bütün sahələrdə köklü islahatlar həyata keçirilib və nəticədə Azərbaycanda sabitlik və əmin-amanlıq bərpa olunub.
Diqqətə çatdırıb ki, Tacikistan Prezidenti Emomali Rəhmon da ölkəsində belə bir missiya həyata keçirib.
Görüşdə iki ölkənin daxili işlər orqanları arasında hüquqi bazanın təkmilləşdirilməsi və Azərbaycan vətəndaşlarının miqrasiya məsələlərinin həlli müzakirə olunub. Müvafiq sahədə tələbə mübadiləsinin aparılması, birgə kurslarda iştirak və qarşılıqlı maraq doğuran digər məsələlərlə bağlı fikir mübadiləsi aparılıb.
Qulu Kəngərli
AZƏRTAC-ın xüsusi müxbiri
Düşənbə
Bölmənin digər xəbərləri
