AZƏRBAYCANLA İTALİYA ARASINDA İKİQAT VERGİTUTMA ARADAN QALDIRILACAQ

22.10.2004 [20:11]
Çap et
A⁺ A^-

AZƏRTAC xəbər verir ki, Milli Məclisin iqtisadi siyasət daimi komissiyasının oktyabrın 22-də keçirilən iclasında “Azərbaycan Respublikası Hökuməti ilə İtaliya Respublikası Hökuməti arasında gəlirlərə və əmlaka görə vergilərə münasibətdə ikiqat vergitutmanın aradan qaldırılması və vergilərin ödənilməsindən yayınmanın qarşısının alınması haqqında” Konvensiyanın və həmin Konvensiyaya Əlavə Protokolun təsdiq edilməsi barədə”, “Azərbaycan Respublikasının Vergi Məcəlləsinə əlavə və dəyişikliklər edilməsi barədə” Qanunun tətbiqi ilə əlaqədar bəzi qanunlara əlavə və dəyişikliklərin edilməsi haqqında” və “İxrac nəzarəti haqqında” qanun layihəsi üçüncü oxunuşda müzakirə olunmuşdur.

Komissiyanın sədri Səttar Səfərov birinci layihə ilə bağlı məlumat verərkən demişdir ki, İtaliya böyük səkkizliyə daxil olan dövlətlərdən biridir. Bu ölkə ilə Azərbaycan arasında ikiqat vergitutmanın aradan qaldırılması iqtisadi ticarət əlaqələrinin inkişafına, vergidən yayınmanın qarşısının alınmasına xidmət edəcəkdir. Müzakirlər zamanı deputatlar sənədin Azərbaycanın maraqlarına tam cavab verdiyini bildirmişlər.

Sonra digər layihələrə münasibət bildirilmiş və hər üç layihənin Milli Məclisin müzakirəsinə çıxarılması qərara alınmışdır.