Azərbaycanlı gənc Avropa Şurasının yerli və regional hakimiyyətlər konqresinin plenar iclasında iştirak edib
Bakı, 4 aprel, AZƏRTAC
Azərbaycan Respublikası Gənclər Təşkilatları Milli Şurasının (ARGTMŞ) beynəlxalq əlaqələr üzrə katibi İlhamə Qasımzadə Strasburqda, Avropa Şurasının mənzil-qərargahında yerli və regional hakimiyyətləri konqresinin plenar iclasında iştirak edib.
ARGTMŞ-dan AZƏRTAC-a bildiriblər ki, plenar iclasda Avropa Şurasına daxil olan ölkələrin şəhərlərinin merləri, bələdiyyə nümayəndələri və digər səlahiyyətli şəxslər iştirak ediblər.
Konqresin iclasları ildə iki dəfə keçirilir. Avropa Şurası artıq dörd ildir “Gənc təmsilçi” proqramını reallaşdırır. Proqrama əsasən, Avropa Şurasının üzvü olan ölkələrdən bir gənc seçilir. Həmin gənc bir il ərzində konqresin iki plenar iclasında iştirak edir. Proqramın məqsədi Avropanın yerli səviyyədə qərarvericiliyində gənclərin rolunu gücləndirmək, qəbul olunan qətnamə və qərarlarda gənclərin fikirlərini öyrənməkdir.
Plenar iclaslarda “İnsan hüquqlarının yerli və regional səviyyədə təbliği” və “Qaçqın uşaqların hüquqlarının qorunmasında yerli hakimiyyətlərin rolu və öhdəlikləri” üzrə mövzular müzakirə edilib.
Tədbir çərçivəsində regionlar üzrə Avropa komitəsi ilə konqres arasında əməkdaşlıq müqaviləsi imzalanıb. Müqavilədə gənclərin yerli idarəçilikdə iştirakının təbliği ilə bağlı fəaliyyətlər nəzərdə tutulub.
Bölmənin digər xəbərləri
