İQTİSADİYYAT
“Azəriqaz”da əməyin və ətraf mühitin mühafizəsi üzrə görülmüş işlərə dair müşavirə keçirilib
![“Azəriqaz”da əməyin və ətraf mühitin mühafizəsi üzrə görülmüş işlərə dair müşavirə keçirilib](/files/2022/1/1200x630/16439783722196817823_1200x630.jpg)
Bakı, 4 fevral, AZƏRTAC
“Azəriqaz” İstehsalat Birliyində (İB) Sağlamlıq, Əməyin Təhlükəsizliyi və Ətraf Mühitin Mühafizəsi (SƏTƏMM) sahəsi üzrə 2021-ci ildə görülən işlərin yekunlarına dair onlayn müşavirə keçirilib.
AZƏRTAC xəbər verir ki, müşavirədə Birliyin baş direktoru Ruslan Əliyev, baş direktorun müavinləri, SOCAR-ın SƏTƏMM Departamentinin rəisi Orxan Məmmədov, SOCAR-ın vitse-prezidentinin müşaviri Namiq Abbasov və birliyin tabeli təşkilatlarının rəhbərləri iştirak ediblər.
Birliyin baş direktoru R.Əliyev müşavirəni açaraq SƏTƏMM sahəsinin istehsalatda ən önəmli sahə olduğunu, işçilərin sağlamlığının qorunmasının, təhlükəsiz iş mühitinin yaradılmasının əsas vəzifə olduğunu bildirib.
Baş direktorun əməyin mühafizəsi üzrə müavini Ceyhun Şıxəliyev 2021-ci ilin yekunlarına dair hesabatı təqdim edərək, görülmüş işlər və əldə olunmuş nailiyyətlər barədə müşavirə iştirakçılarına əhatəli məlumat verib. O bildirib ki, qarşıya qoyulmuş tapşırıqların icrası zamanı qayda və normaların tələbləri əsasında işlər icra edilib, işçilər xüsusi geyim, fərdi mühafizə vasitələri tam təmin olunub, əmək şəraitinin yaxşılaşdırılması məqsədilə təmirə ehtiyac olan istehsalat binaları təmir olunub və görülmüş işlərin nəticəsi olaraq 2021-ci ildə, həmçinin son illərdə istehsalatda ölümlə nəticələnən bədbəxt hadisə baş verməyib. Həmçinin baş direktorun müavini 2022-ci il ərzində qarşıya qoyulan hədəflərə çatmaq üçün istehsalatda əməyin və ətraf mühitin mühafizəsinin daima nəzarətdə saxlanacağını, maarifləndirmə və təlimatlandırma işlərinin davamlı təşkil olunacağını, fəhlə və mühəndis-texniki işçilərin əməyin mühafizəsi üzrə kurslara və seminarlara cəlbinin mütəmadi təşkil ediləcəyini bildirib.
Birliyin tabeli təşkilatlarının rəhbərləri hesabat verərək ötən il ərzində sahə üzrə görülmüş işləri diqqətə çatdırıblar. Cari ildə qarşıya qoyulmuş tapşırıqların təhlükəsiz və qəzasız yerinə yetirilməsi üçün planlar haqqında məlumat veriblər.
Müşavirədə SOCAR-ın sahə üzrə mütəxəssisləri çıxış edərək fikir və tövsiyələrini, əməyin və ətraf mühitin mühafizəsinin SOCAR-ın rəhbərliyinin daima diqqətində olduğunu bildiriblər.
Müşavirənin sonunda Birliyin baş direktoru R.Əliyev və SOCAR-ın nümayəndələri tərəfindən 2021-ci ildə əməyin və ətraf mühitin mühafizəsi üzrə görülən işlər müsbət qiymətləndirilib və gələcək illərdə qəzasız iş saatlarının əldə olunması üçün lazımi tapşırıqlar verilib.