Bakı, 14 aprel, AZƏRTAC

"Azəristiliktəchizat" ASC 2022-2023-cü illər payız-qış mövsümü ərzində abonentləri keyfiyyətli və dayanıqlı istilik enerjisi ilə təchiz edib.

AZƏRTAC xəbər verir ki, bunu istilik mövsümünün bitməsinə həsr olunmuş mətbuat konfransında “Azəristiliktəchizat” ASC-nin sədri vəzifəsini müvəqqəti icra edən İlham Mirzəliyev deyib.

Bildirilib ki, ASC-nin istilik təsərrüfatlarında istehlakçıları keyfiyyətli, dayanıqlı və fasiləsiz istilik enerjisi ilə təmin edilməsi məqsədilə 2022-2023-cü illər payız-qış mövsümü ərzində ən zəruri işləri görülüb, o cümlədən qəza-təmir işlərinin operativ aradan qaldırılması təmin edilib: “4470 metr məhəllədaxili və magistral istilik xətləri yenisi ilə əvəzlənib. 28 ədəd qazan aqreqatı cari, 1 ədəd qazan əsaslı, 40 ədəd odluq cari təmir olunub və 4 ədəd yenisi ilə əvəzlənib. 22 dəst istilik mübadilə aparatları, 31 ədəd kimyəvi su yumşaltma qurğuları, 59 ədəd nasos cari və 12 ədəd əsaslı təmir edilib, 12 ədədi isə yenisi ilə əvəzlənib. Müxtəlif diametrli 586 ədəd siyirtmə, onlardan 136 ədəd cari təmir olunub, 48 ədəd isə yenisi ilə əvəzlənib. 51 ədəd mühərrik cari, 54 ədəd əsaslı təmir olunub, 12 ədəd isə yenisi ilə əvəzlənib”.

Qeyd edilib ki, respublikanın dağ rayonlarında noyabrın 1-dən, Bakı şəhərində və ölkənin digər ərazilərində yaşayış binaları, sosial və təsərrüfat obyektlərinin noyabrın 15-dən istiliklə təmin edilməsinə başlanılıb. Cəmiyyətə məxsus 562 qazanxana və 88 istilik məntəqəsi istismar edilməklə 3 min 866 yaşayış binası, o cümlədən 184 minə yaxın mənzil, 286 məktəb, 160 uşaq bağçası, 150 səhiyyə müəssisəsi və 2 min 445 digər sosial və təsərrüfat obyektlərinin fasiləsiz və etibarlı istiliklə təmin olunmasına imkan verib. Bu məqsədlə 2022-ci ilin yekunları üzrə istehsal və maliyyə təsərrüfat fəaliyyəti haqqında ilkin hesabata əsasən 1759 QVt (1 512 740 Qkal) istilik enerjisi istehsal edilib.

Azərbaycan Respublikası Nazirlər Kabinetinin 2022-ci il 21 iyun tarixli sərəncamı ilə "Azərbaycan Respublikasının işğaldan azad edilmiş ərazilərində 2022-2026-cı illərdə yaşıl enerji zonasının yaradılması üzrə Tədbirlər Planı" təsdiq edilib və "Optimal istilik və isti su təchizatı sistemlərinin seçilməsi və müvafiq infrastrukturun qurulması ilə bağı təkliflərin hazırlanaraq təqdim edilməsi" "Azəristiliktəchizat" ASC-yə həvalə olunub. "İşğaldan azad edilmiş ərazilərimizdə enerji infrastrukturunun bərpası və yenidən qurulması ilə Əlaqələndirmə Qərargahının nəzdində fəaliyyət göstərən İdarələrarası Mərkəzin "Şəhərsalma" və “Enerji təminatı məsələləri” İşçi Qrupunda təmsil olunan "Azəristiliktəchizat" ASC Baş Planların müzakirələrində və istilik infrastrukturunun yaradılması ilə bağlı təkliflərin hazırlanmasında fəal iştirak edir.

Diqqətə çatdırılıb ki, 2022-ci il üzrə istilik haqlarının ödəniş səviyyəsi 94,7 faiz təşkil edib. Noyabrın 15-dən aprelin 1-dək əhali istehlakçı qrupu üzrə ödəniş səviyyəsi 65,2 faiz olub. Təəssüf ki, bəzi yaşayış binalarında ödəniş səviyyəsi ürəkaçan səviyyədə olmayıb. Əsas çətinliklərdən biri keçmiş qaçqın və məcburi köçkünlərin məskunlaşdıqları şəhərciklərdə istilik haqlarının ödənişi ilə bağlıdır. Görülən işlər nəticəsində son mövsüm ərzində keçmiş qaçqın və məcburi köçkünlərin ödəniş dinamikasında müsbət tendensiya qeydə (52,9 faiz) alınmasına baxmayaraq, əvvəlki illərdə istifadə edilən istilik və isti su xidmətlərinə görə 6 milyon 652,4 min manat ödənilməmiş borc məbləği mövcuddur.

“Azəristiliktəchizat” ASC Energetika Nazirliyi və Ekologiya və Təbii Sərvətlər Nazirliyi ilə istilik mövsümünün müddətlərinə baxılmasına dair müzakirələr aparmaqdadır və təbii olaraq nəticələrinə dair ictimaiyyətə əlavə məlumat veriləcək. Mövcud qaydalara əsasən, noyabrın 15-dən aprelin 15-dək davam edən mövsüm xarici havanın temperaturuna əsasən tənzimlənir.

ASC istehsal və əməliyyat səmərəliyini artırmaq, uçot sistemini təkmilləşdirmək, həmçinin istilik enerjisindən səmərəli istifadəni stimullaşdırmaq və fəaliyyətini müasirləşdirmək məqsədilə istilik və isti su sayğaclarının quraşdırılması işlərinə başlayıb.

Bu məqsədlə ilkin olaraq 60 istilik sayğacının satınalınması prosesi yekunlaşdırılıb və pilot layihə çərçivəsində qeyri-əhali abonentləri üçün quraşdırılmasına başlanılıb. Layihə nəticəsində istilik və isti su məqsədləri üçün istilik enerjisinin istehsalının və çatdırılmasının resurs və maliyyə tələbi daha dəqiq müəyyən olunacaq, xidmət keyfiyyətinin yüksəldilməsi, istehsal prosesinin daha səmərəli təşkili təmin edilməklə, istehlakçı məmnunluğunun artırılması üçün əsaslı zəmin yaradılması mümkün olacaq.

Bundan başqa, isti su təchizatının sayğaclaşdırılması ilə bağlı əlavə tədbirlər görülməkdədir və mövcud isti su sayğaclarının yenilənməsi üçün Azərbaycanda yeganə yerli sayğac istehsalçısı olan “Gəncə Cihazqayırma zavodu” ASC ilə qanunvericiliyə uyğun olaraq 3500 ədəd isti su sayğacının alınmasına dair müqavilə imzalanıb və artıq sayğacların yenilənməsi işlərinə başlanıb. Hazırda istilik sayğacları quraşdırılmadığı hallarda istilik təchizatı xidmətləri əhali istehlakçıları üçün mənzilin bir kvadratmetr yaşayış sahəsinə görə, qeyri-əhali istehlakçıları üçün binanın 1 kubmetr tikinti həcminə görə Azərbaycan Respublikası Tarif (qiymət) Şurasının 2011-ci il 24 noyabr tarixli 4 nömrəli qərarına əsasən müəyyən etdiyi tariflərlə hesablanır.

İslahatlar üzrə proqrama əsasən “Azəristiliktəchizat” ASC-nin müasirləşdirilməsi, səmərəliliyinin artırılması, xidmət səviyyəsinin yüksəldilməsi, kommersiyalaşdırma və gücləndirilməsi istiqamətində rəqəmsallaşma icra edilib.

Şirkətdə İT infrastrukturuna olan tələbat optimallaşdırılıb, daxili şəbəkə sistemi yaradılıb. Biznes proseslərinin avtomatlaşdırılması, idarəetmənin çevikliyinin artırılması üçün müasir uçot və hesabatlılıq sistemləri qurulub, maliyyə, satınalmalar, insan resursları, abonent və müştəri xidmətləri kimi vacib funksiyaların rəqəmsəllaşdırılmasına baxımından “1C ERP” proqram təminatının tətbiqinə başlanılıb.

Mövsüm ərzində şirkətin kommersiya fəaliyyətinin genişləndirilməsi məqsədilə xidmət sahələrinin yaradılması üzərində araşdırma aparılıb və yeni 7 istiqamətdə xidmətlər təklif edilir. Bundan başqa, yeni xidmətlərin təkmilləşdirilməsi üçün şirkətin rəhbər heyətindən və mütəxəssislərindən ibarət komissiya yaradılıb.

İşə qəbul prosesində şəffaflığın təmin olunması məqsədilə vakant yerlərə namizədlər test və müsabiqə yolu ilə aparılır. İxtisasa uyğun kadrların seçilməsi üçün iş elanları mütəmadi olaraq rəsmi internet səhifəmizdə və sosial şəbəkə hesablarında yerləşdirilməkdədir. Çevik və effektiv ictimaiyyətlə əlaqələr və kommunikasiya işi qurulub, müvafiq sistem və korporativ bacarıqlar yaradılması üzrə işlər davam etdirilir.

Qeyd olunub ki, “Azəristiliktəchizat” ASC vətəndaşların müraciətlərinin vaxtında qəbul edilməsi və işlənilməsini təmin etmək məqsədilə 956 “Çağrı Mərkəzi”nin fəaliyyətini müasir avadanlıqlar və texnologiyalar tətbiq etməklə daha da təkmilləşdirib, analoq sistemdən rəqəmsal sistemə keçid edilib. Zənglərdə növbəlilik sistemi təmin edilib, 20 zəngi eyni anda qəbuletmə imkanı yaradılıb. 2022-2023-cü illər payız-qış mövsümü ərzində “Azəristiliktəchizat” ASC “Çağrı Mərkəzi” vasitəsilə 12 min 400 vətəndaş müraciəti qəbul edilib. Bunlardan 8 min 502-si istilik və isti su təchizatı xidmətləri, 1499-u borcla əlaqədar, 2 min 399-u isə digər məsələlərlə bağlı müraciətlər təşkil edib. Vətəndaşların sualları operativ şəkildə cavablandırılıb, araşdırma tələb edən müraciətlər aidiyyəti üzrə müvafiq struktur bölmələrinə və tabeli qurumlara yönləndirilib, müraciət edən şəxslər araşdırmaların nəticələri barədə məlumatlandırılıblar.

Azərbaycan Respublikasının Prezidentinin 2020-ci il 27 fevral tarixli Sərəncamı ilə təsdiq edilmiş “Açıq hökumətin təşviqinə dair 2020-2022-ci illər üçün Milli Fəaliyyət Planı”nın 9.4-cü bəndi əsasında yaradılan Kommunal xidmətlərlə bağlı vahid Çağrı Mərkəzinə inteqrasiya edilib. ASC-nin Kommunal Xidmətlər ilə bağlı vahid Çağrı Mərkəzinə inteqrasiyası istilik təchizatı sahəsində analitik təhlillərin aparılmasını, proqnozların hazırlanmasını və mərkəzləşdirilmiş elektron xidmətlərin göstərilməsini təmin etmək məqsədi daşıyır.