İQTİSADİYYAT
“Azərkosmos” Yer səthinin məsafədən müşahidə xidmətlərinin təşviqinə dair müsabiqənin növbəti mərhələsini elan edir
Bakı, 27 fevral, AZƏRTAC
“Azərkosmos” ASC “Azərbaycanın davamlı inkişafı naminə Yer səthinin məsafədən müşahidə xidmətlərinin təşviqi” müsabiqəsinin 2018-2019-cu illər üzrə keçiriləcək növbəti mərhələsini elan edir.
ASC-dən AZƏRTAC-a bildirilib ki, fevralın 27-də “Azərkosmos” ASC 2016-2017-ci illər ərzində təşkil olunan “Azərbaycanın davamlı inkişafı naminə Yer səthinin məsafədən müşahidəsi xidmətlərinin təşviqi” müsabiqəsinin qalibləri ilə görüş keçirib.
Görüşdə müsabiqə çərçivəsində qalib gələn səkkiz layihənin nəticələri müzakirə olunub. Qalib layihələrin hesabat sənədlərində əsasən Azərbaycan ərazisində yerləşən palçıq vulkanlarının, buzlaqların, Kür və Araz çaylarının hövzələrində çay daşmalarının və onların fəsadlarının proqnozlaşdırılması, Abşeron yarımadasının ərazisində neft hasilatı zamanı neftlə çirklənmiş torpaq ərazilərinin spektral xarakteristikaları və bu kimi digər məsələlərin “Azersky” Yer səthinin məsafədən müşahidəsi peykindən əldə edilən peyk təsvirləri vasitəsilə öyrənilməsi öz əksini tapıb.
Bununla yanaşı, görüşdə 2018-2019-cu illər üzrə keçirilməsi planlaşdırılan növbəti “Azərbaycanın davamlı inkişafı naminə Yer səthinin məsafədən müşahidə xidmətlərinin təşviqi” müsabiqəsi elan olunub. Layihə çərçivəsində elmi-tədqiqat institutları, universitetlər, elmi-tədqiqatla məşğul olan digər qurumlar, həmçinin hüquqi və ya fiziki şəxslər öz təkliflərini təqdim edə bilərlər.
Təkliflər 2018-ci il aprelin 30-dək qəbul olunacaq.
“Azərkosmos” ASC cari il mayın 31-dək qalib təkliflərin müəlliflərini təmənnasız olaraq təkliflərində qeyd olunan tələblərə uyğun olaraq “Azersky” peyki vasitəsilə əldə olunan təsvirlərlə təmin edəcək.
Qeyd edək ki, “Azərkosmos” ASC-nin 2016-cı ildə başladığı “Azərbaycanın davamlı inkişafı naminə Yer səthinin məsafədən müşahidəsi xidmətlərinin təşviqi” layihəsinin əsas məqsədi “Azersky” peykindən əldə olunan təsvirlərin ölkə daxilində istifadəsini təşviq etmək və Azərbaycanda Yer səthinin məsafədən müşahidəsi xidmətlərinin inkişafına təkan verməkdir.
Qeyd edək ki, Cənubi Qafqazda ilk peyk operatoru olan “Azərkosmos” ASC telekommunikasiya və coğrafi kəşfiyyat sahələri üçün yüksəkkeyfiyyətli peyk xidmətləri təqdim edir. 2013-cü ilin fevral ayında orbitə buraxılan və “Azərkosmos” tərəfindən idarə edilən “Azerspace-1” peyki 46° şərq uzunluğu orbital mövqeyində yerləşir və Avropa, Afrika, Yaxın Şərq, Qafqaz və Mərkəzi Asiya regionlarını əhatə edir. Ən azı 15 il müddətində orbitdə fəaliyyət göstərəcək peykin faydalı yükü 36 transponderdən ibarətdir: C diapazonda 24, Ku diapazonda 12 transponder. 2014-cü ilin dekabr ayından etibarən “Azərkosmos” sayca ikinci, təyinatına görə yüksək ayırdetməli (1,5 m ayırdetmə) Yer səthinin məsafədən müşahidə peyki olan “Azersky”ın idarəçiliyini təhvil alıb və bununla da geoinformasiya xidmətləri də daxil olmaqla Yer səthinin məsafədən müşahidəsinin kommersiya fəaliyyətinə başlayıb. Şirkətin strateji inkişaf planlarına əhatə dairəsinin və xidmətlər spektrinin genişləndirilməsi daxildir. Bu məqsədlə “Azərkosmos” 2018-ci ildə ikinci telekommunikasiya peyki “Azerspace-2”ni 45° şərq uzunluğu orbital mövqeyinə çıxarmağı və qarşıdakı illərdə çox yüksək ayırdetməli Yer səthinin məsafədən müşahidə peyki əldə etməyi planlaşdırır.
Daha ətraflı məlumatı “www.azercosmos.com” internet səhifəsindən əldə etmək olar.