Bakı Beynəlxalq Suluboya Festivalı çərçivəsində növbəti ustad dərsi keçiriləcək
Bakı, 25 avqust, AZƏRTAC
“Xəzərin dalğaları” adlı I Bakı Beynəlxalq Suluboya Festivalı çərçivəsində ustad dərsləri davam edir.
Dövlət Rəsm Qalereyasından AZƏRTAC-a bildirilib ki, növbəti ustad dərsi avqustun 28-də, saat 12:00-da “Zoom” proqramı üzərindən rəssam Fəxrəddin Qəhrəmanlının rəhbərliyi ilə keçiriləcək.
Ustad dərsini Xətai Sənət Mərkəzinin (+994) 12 490 84 51/52/53, (+994) 50 564 40 70 nömrələri ilə əlaqə saxlayıb qeydiyyatdan keçərək “Zoom” proqramı üzərindən canlı yayım vasitəsilə izləmək mümkündür.
Sənətsevərlər dərsləri Azərbaycan Dövlət Rəsm Qalereyasının sosial media (“facebook”, “instagram”) hesabları vasitəsilə də izləyə bilərlər.
Qeyd edək ki, Mədəniyyət Nazirliyi, Azərbaycan Rəssamlar İttifaqı, Azərbaycan Dövlət Rəsm Qalereyası, İWS Globe - Beynəlxalq Suluboya Cəmiyyətinin Azərbaycan nümayəndəliyi (İWS Azerbaijan) və Xətai Sənət Mərkəzinin təşkilatçılığı ilə “Könüllülər ili” çərçivəsində “Xəzərin dalğaları” adlı I Bakı Beynəlxalq Suluboya Festivalına start verilib.
Festival suluboya (akvarel) texnikası ilə çəkilmiş əsərlərə marağı artırmaq, həmçinin təsviri sənətin bu istiqamətində çalışan rəssamların yaradıcılığında Azərbaycanın təbiəti, tarixi abidələri, mədəniyyətini, həmçinin müasir inkişafını dünyaya göstərmək məqsədilə keçirilir.
Bölmənin digər xəbərləri
