BAKI POLİSİ 2005-Cİ İLDƏ QARŞIYA QOYULMUŞ VƏZİFƏLƏRİN ÖHDƏSİNDƏN UĞURLA GƏLMİŞDİR
BŞBPİ-nin rəisi, general-leytenant Məhərrəm Əliyev ötən ilin yekunlarına həsr olunmuş məruzəsində bildirmişdir ki, son illər olduğu kimi, hesabat dövründə də ümummilli liderimiz Heydər Əliyevin tövsiyələri, Prezident İlham Əliyevin siyasi kursu Bakı şəhər polis qarnizonunun fəaliyyətinin əsasını təşkil etmişdir. Cəmiyyətin bütün sahələrində demokratikləşmə prosesi polis orqanlarından da yan keçməmiş, əməliyyat-xidməti fəaliyyətimiz beynəlxalq normalar çərçivəsində aparılmışdır. Vətənə, xalqa xidmət etməyi özünün şərəfli işi hesab edən şəhərin polis orqanları vətəndaş hüquq və azadlıqlarının etibarlı təminatına diqqəti artırmışdır. Həm əhaliyə, həm də polis orqanlarına qanunvericiliyin tələblərinə daha ciddi riayət olunması aşılanmış və bu proseslər əməkdaşlarımızda peşə hazırlığı səviyyəsinin artırılmasına kömək etmişdir.
Məhərrəm Əliyev bildirmişdir ki, ötən il bütövlükdə polis orqanları üçün heç də asan olmamış, ayrı-ayrı mənfi hadisələr polisin ünvanına əsaslı iradların səslənməsinə səbəb olmuşdur. Bütün bu çətinliklərə baxmayaraq, Bakı polisinin şəxsi heyəti çoxillik ənənəsinə sadiq qalaraq qarşıya qoyulmuş vəzifələrin öhdəsindən ümumən gəlmiş, vətəndaşların təhlükəsizliyi, ictimai asayişin qorunması təmin edilmişdir.
Qeydə alınmış cinayətlərin ümumi sayı 2004-cü illə müqayisədə 15 fakt, ağır və xüsusilə ağır növ cinayətlərin sayı isə cəmi 61 fakt artmışdır.
Cinayətkarlığın dinamikasına müxtəlif mənfi amillərin təsir göstərməsinə baxmayaraq, əməliyyat şəraiti daim nəzarətdə saxlanılmış, cinayətlərin, xüsusən də ağır növlərinin qarşısının alınması üçün təsirli tədbirlər görülmüşdür. Statistik göstəricilərin təhlili göstərmişdir ki, son 15 ildə qəsdən adam öldürmə cinayətlərinin ən az baş verməsi məhz 2005-ci ildə müşahidə edilmiş, 2004-cü ilə nisbətən isə belə faktların sayı 5,4 faiz azalmışdır. Bununla yanaşı, quldurluq 4,5, xuliqanlıq 13,5, dələduzluq 37,4, döymə faktlarının sayı isə 3,6 faiz aşağı düşmüş, öldürməyə cəhdlərin, hədə qorxu ilə tələbetmə cinayətlərinin sayı sabit qalmışdır.
Paytaxtda yol-nəqliyyat qəzalarının sayının çoxalmasından və bunların qarşısının alınmasından danışan BŞBPİ-nin rəisi dedi ki, bu sahəyə diqqət artırılmalı və mövcud problemlər aradan qaldırılmalıdır.
Xüsusi vurğulandı ki, hesabat dövründə baş idarənin və yerli polis orqanlarının rəhbərliyi xidmətdə fərqlənən əməkdaşları mükafatlandırmaqla yanaşı, xidməti və icra intizamı qaydalarını pozan əməkdaşların cavabdehlik daşımalarını diqqətdə saxlamışdır. Mənfi motivlərə görə 54 sıravi və kiçik rəis heyəti, 27 orta rəis heyəti əməkdaşı daxili işlər orqanlarından xaric edilmiş, 43 əməkdaş nazirliyin və baş idarənin əmrləri ilə tutduqları vəzifədən aşağı vəzifələrə təyin olunmuşlar.
BŞBPİ-nin ayrı-ayrı idarə və şöbələrinin, rayon polis idarələrinin rəisləri qazanılan uğurlardan, yol verilmiş nöqsanlardan və qarşıda duran vəzifələrdən danışdılar.
Polis general-leytenantı Məhərrəm Əliyev müşavirəyə yekun vuraraq dövlətimizin başçısını əmin etdi ki, təməli ümummilli liderimiz Heydər Əliyev tərəfindən qoyulmuş əmin-amanlığın pozulmasına bundan sonra da imkan verilməyəcək, Konstitusiyamıza və dövlətçiliyimizə zidd olan bütün hərəkətlərin qarşısı qətiyyətlə alınacaqdır. Paytaxtda ictimai təhlükəsizliyin təmin olunması şəhər polis orqanlarının müqəddəs borcudur və bu missiyanın öhdəsindən həmişə olduğu kimi, bundan sonra da layiqincə gəlinəcəkdir.
Bölmənin digər xəbərləri
