BAKI UŞAQ TEATRI QASTROLA HAZIRLAŞIR
Bakı Uşaq Teatrından AZƏRTAC-a bildirmişlər ki, kollektiv noyabrın 1-dən Naxçıvan Muxtar Respublikasına qastrol səfərinə hazırlaşır. Qastrol müddətində teatrın kollektivi tamaşaçılara 6 səhnə əsəri (“Sidan və qoğal”, “Turpun nağılı”, “Tülkü həccə gedir”, “Vətən”, “Sıravi Dursun”, “Şən klounlar”) göstərəcəkdir.
Bundan əlavə teatrın artisti, illuziyaçı Tofiq İskəndərli “Şou-maqia” proqramı ilə çıxış edəcəkdir.
Teatrın kollektivi müxtəlif yerlərdə, o cümlədən hərbi hissələrdə 30-a yaxın tamaşa göstərməyi nəzərdə tutmuşdur. Əsas rollarda Zaur Şirməmmədli, Kəbirə Əmiraslanova, Samir Həşimli, Namiq Adiloğlu, Elmira Həsənova və başqaları çıxış edəcəklər.
