BAKIDA 1-Cİ BEYNƏLXALQ KƏND TƏSƏRRÜFATI SƏRGİSİ KEÇİRİLƏCƏKDİR
AZƏRTAC xəbər verir ki, mayın 23-dən 25-dək Bakıda, Heydər Əliyev adına İdman-Konsert Kompleksində Böyük Britaniyanın İTE Group PLC və onun Azərbaycandakı tərəfdaşı İteca Caspian LLC şirkətlərinin birgə təşkilatçılığı ilə 1-ci Beynəlxalq kənd təsərrüfatı sərgisi keçiriləcəkdir.
Respublikamızda ilk dəfə keçiriləcək “Agrihort Azerbaijan-2007” sərgisində qonaqlara bitkiçilik və heyvandarlıq sahəsində mövcud yeniliklər təqdim olunacaq, müxtəlif profilli kənd təsərrüfatı texnikası və inventarının ən yeni nümunələri nümayiş etdiriləcəkdir.
Sərgiyə gələnlər kənd təsərrüfatı traktorları, suvarma və meliorasiya texnikası, mineral və bioloji gübrələr, toxumlar və s. bölmələrlə tanış olacaqlar.
Sərgi Azərbaycanın Kənd Təsərrüfatı və İqtisadi İnkişaf nazirlikləri, Ticarət və Sənaye Palatası, Azərbaycanda İxracın və İnvestisiyaların Təşviqi Fondu (AZPROMO), Azərbaycan Türk Sənayeçi və İş Adamları Beynəlxalq Cəmiyyəti (TÜSİAB) tərəfindən dəstəklənir.
Tədbirdə Azərbaycanla yanaşı, Almaniya, Türkiyə, Fransa, İran, Rusiya və digər ölkələrin şirkətləri də iştirak edəcəklər.
Bölmənin digər xəbərləri
