Bakıda “Avrointeqrasiya-beynəlxalq gənclər forumu” layihəsi həyata keçirəcəkdir
Bakı, 18 noyabr (AZƏRTAC). Azərbaycan Gənclərinin Avropaya İnteqrasiyası Təşkilatı (AGAT) Azərbaycan Respublikasının Prezidenti yanında Gənclər Fondunun maliyyə dəstəyi ilə dekabrın 9-dan 13-dək Bakıda “Avrointeqrasiya - beynəlxalq gənclər forumu” layihəsi həyata keçirəcəkdir.
AGAT-ın mətbuat xidmətindən AZƏRTAC-a bildirmişlər ki, layihənin məqsədi Avropanın və Azərbaycanın gəncləri arasında əməkdaşlığın daha da inkişaf etdirilməsi, habelə Avropalı gənclərlə Ermənistan - Azərbaycan, Dağlıq Qarabağ münaqişəsi və enerji siyasəti ilə bağlı müzakirələrin təşkil edilməsidir.
Forumda “Avropaya inteqrasiya prosesində Azərbaycanın rolu”, “Avropa təsisatlarında Azərbaycan gənclərinin fəaliyyəti”, “Azərbaycanın Avroatlantik məkanda inkişaf perspektivləri”, “Şərq tərəfdaşlığı” mövzularında müzakirələr aparılacaqdır.
Forumda Fransa, Almaniya, İsveçrə, Türkiyə, Böyük Britaniya, Polşa, İspaniya, Ukrayna, Belçika və Macarıstanın gənc fəalları iştirak edəcəklər.
Bölmənin digər xəbərləri
