Bakıda Əli bəy Hüseynzadəyə həsr olunmuş sərgi açılıb
Bakı, 3 iyul, AZƏRTAC
Bakıda Birinci Türkoloji Qurultayın 100 illiyinə həsr olunmuş “Türk Dünyası Həftəsi” çərçivəsində “Əli bəy Hüseynzadə: böyük mütəfəkkir və rəssam” adlı sərgi açılıb. Ekspozisiya Mədəniyyət Nazirliyi, Azərbaycan Milli İncəsənət Muzeyi və Azərbaycan İstiqlal Muzeyinin birgə təşkilatçılığı ilə ərsəyə gəlib.
AZƏRTAC xəbər verir ki, Milli İncəsənət Muzeyində keçirilən sərgi Birinci Türkoloji Qurultayın Rəyasət Heyətinin fəxri üzvü, görkəmli mütəfəkkir, Türk dünyasının ideoloqu və Azərbaycan realist rəngkarlığının banilərindən olan Əli bəy Hüseynzadəyə həsr edilib.
Sərgidə Azərbaycan Milli İncəsənət Muzeyindən, Azərbaycan İstiqlal Muzeyindən və şəxsi kolleksiyalardan əsərlər, eləcə də arxiv fotoşəkilləri və sənədləri nümayiş olunur. Ziyarətçilər Əli bəy Hüseynzadənin Azərbaycan və Türkiyədə yaratdığı əsərləri, o cümlədən “Bibi-Heybət məscidi”, “Atatürkün portreti”, “Ailə portreti” və digər əsərlərə baxa bilərlər. Ekspozisiyada, həmçinin Əli bəy Hüseynzadənin redaktoru olduğu “Həyat” qəzetinin ipəkdə çap olunan nadir nüsxəsi də yer alır.
Ekspozisiyanın ayrı-ayrı bölmələri mütəfəkkirin ictimai və maarifçilik fəaliyyətinə, teatr sənətinin inkişafındakı töhfəsinə və Azərbaycan Bayrağının ideoloji əsaslarının formalaşmasındakı roluna həsr olunub. Sərgidə 1926-cı il Birinci Türkoloji Qurultayının iştirakçılarının arxiv fotoşəkilləri, qurultay zamanı çəkilmiş səkkiz dəqiqəlik səssiz film və Əli bəy Hüseynzadənin övladları - rəssamlar Səlim Turan və Feyzavər Alpsarın yaradıcılığından bəhs edən multimedia təqdimatı yer alır.
Sərginin açılış mərasimində “Türk Dünyası Həftəsi” çərçivəsində xatirə nişanları təqdim edilib. Nişanlar Ankara Hacı Bayram Vəli Universitetinin professorları Esma Özdaşlı və Kadir Ertaç Çelikə, Köln Asiya Akademiyasının rəhbəri Orhan Arasa, filologiya elmləri doktorları, professorlar Minəxanım Təkləliyə və Adil Babayevə, Azərbaycan Milli İncəsənət Muzeyinin direktoru Şirin Məlikovaya, Azərbaycan Respublikası Prezidenti yanında Dövlət İdarəçilik Akademiyasının kafedra müdiri Firdovsiyyə Əhmədovaya, tədqiqatçı və jurnalist Dilqəm Əhmədə təqdim edilib.
Qeyd edək ki, sərgi sentyabrın 30-dək açıq olacaq.
Bölmənin digər xəbərləri
