BAKIDA KƏND TƏSƏRRÜFATI MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
AZƏRTAC xəbər verir ki, dekabrın 29-da Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış-yarmarkaları keçirilmişdir.
“Təzə bazar” MMC-nin həyətindəki yarmarkada alıcılara Sabirabad, Salyan, Gədəbəy, Tovuz, Hacıqabul və digər rayonlardan gətirilmiş məhsullar təklif olunurdu.
Səhər tezdən şəhər sakinləri yarmarkaya gələrək bayram süfrəsi üçün həvəslə təzə və keyfiyyətli məhsullar alırdılar. Onlar bəzi məhsulların bazarlardakından ucuz olduğuna görə yarmarkanın təşkilatçılarına və fermerlərə minnətdarlıq edirdilər.
Vəziyyətlə tanış olmaq üçün buraya gəlmiş kənd təsərrüfatı naziri İsmət Abasov demişdir ki, bu gün paytaxtın bütün rayonlarında bayram yarmarkası yüksək səviyyədə təşkil olunmuşdur. Məhsulların çeşidi çox, keyfiyyəti yüksəkdir. Artıq 154-cü yarmarka keçirilir. Yarmarkalar süni qiymət artımının qarşısını almaq üçün həyata keçirilən iqtisadi tədbirdir. İndiyədək bu yolla 30 min tondan çox kənd təsərrüfatı məhsulu satılmışdır. Kənd Təsərrüfatı, İqtisadi İnişaf nazirlikləri və digər əlaqədar qurumlar tərəfindən qiymətlərə nəzarət olunur.
Cari ilin yekunlarından danışan nazir qeyd etmişdir ki, kənd təsərrüfatı məhsullarının istehsalı 11 ayda ötən ilin müvafiq dövrünə nisbətən 4,5 faiz artımdır. İlin sonunda bu rəqəm 5 faizə yaxın olacaqdır. Potensialımız böyükdür. Ona görə də inanıram ki, gələn il bu artım 7-8 faiz olacaqdır. Yeri gəlmişkən, bu il ötən illə müqayisədə 170 min hektarda əlavə səpin aparılmış, o cümlədən 130 min hektarda ərzaq buğdası əkilmişdir. Bu, gələn il ən azı 300 min ton əlavə ərzaq buğdası əldə olunacağına təminat verir.
Nazir əmin etmişdir ki, fermer və sahibkarların istehsal etdiyi məhsulların istehlakçıya süni qiymət artımı olmadan çatdırılmasına çalışacağıq.
Kənd Təsərrüfatı Nazirliyi mətbuat xidmətinin rəhbəri Murtuzəli Hacıyevin verdiyi məlumata görə, şənbə günü burada əhaliyə 66 ton məhsul, o cümlədən 8 ton ət, 1 ton ağartı, 17,5 ton tərəvəz, 25 ton kartof, 1,5 ton bostan, 13 ton meyvə, 30 min ədəd yumurta təklif olunmuşdur.
Metronun “Əhmədli” stansiyasının yaxınlığında, Sarayevo küçəsində, “Bakı” kinoteatrının yanında “Bülbülə” kiçik müəssisəsinin “Azər” ticarət mərkəzində Salyan, Kürdəmir, Quba, Şəmkir, Ağcabədi, Qax, Biləsuvar Şəki, və Qəbələ rayonlarının fermerləri meyvə-tərəvəz, konserv məhsulları, ət və ağartı satırdılar. 31 dekabr - Dünya azərbaycanlılarının həmrəyliyi günü və Yeni il münasibətilə əhaliyə təklif olunan məhsullar arasında kartof, alma, narıngi, heyva, bal, heyvandarlıq məhsulları üstünlük təşkil edirdi.
Kənd Təsərrüfatı Nazirliyinin nümayəndəsi Rafiq Nəcəfovun verdiyi məlumata görə, bu gün yarmarkaya 262,7 ton kənd təsərrüfatı məhsulları gətirilmişdir.
Suraxanıda “Günəş” ticarət mərkəzindəki yarmarkada Qobustan, Balakən, Samux, Daşkəsən, Salyan və Biləsuvar rayonlarının fermerləri satışa 48 ton məhsul çıxarmışdılar.
Kənd Təsərrüfatı Nazirliyinin nümayəndəsi Mustafa Rüstəmov dedi ki, bayram ərəfəsində əhalinin tələbatı nəzərə alınaraq buraya gətirilən kənd təsərrüfatı məhsullarının həcmi xeyli artırılmışdır. Yarmarkalarda satılan məhsulların qiymətləri bazardakından 25-30 faizə qədər ucuzdur.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada paytaxt sakinlərinə 5 tondan çox məhsul təklif olunurdu.
A.Şərifzadə küçəsi, 194, metronun “İnşaatçılar” stansiyasının yaxınlığındakı yarmarkada Dünya azərbaycanlılarının həmrəyliyi günü və Yeni il münasibətilə əsl məhsul bolluğu yaradılmışdı.
Yarmarkada satışa Salyan, Qusar, Dəvəçi, Astara, Oğuz və digər rayonlardan gətirilmiş 18 ton tərəvəz, 5 ton bostan bitkisi, 7 ton taxıl, 31 ton meyvə, 3 ton ət, 2 min ədəd yumurta çıxarılmışdı.
Yarmarkada qiymətlər bazardakından 30-40 faiz aşağı idi.
Dəvəçidən 2 tondan çox alma gətirmiş Novruz Salmanov yaradılmış şəraitdən razılığını bildirdi. Burada kartofun kiloqramı 40-60, soğan 25, kələm 20-25, alma 50-70, xurma 40-50 qəpiyə, xiyar 1, pomidor 2 manata, mal əti 3 manat 40, qoyun əti 4 manat 20 qəpiyə, yumurta 12 qəpiyə satılırdı.
Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada satışa Saatlı, Salyan, Ağdaş, Masallı və digər rayonlardan 14 tondan çox məhsul gətirilmişdi.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısında təşkil olunmuş yarmarkaya Yeni il ərəfəsində Qazax və Ağsu rayonlarından gətirilmiş kənd təsərrüfatı məhsullarının həm kəmiyyəti, həm də çeşidi artırılmışdı. Ağsu rayonu İcra hakimiyyəti başçısının aqrar məsələlər üzrə müavini Elxan Abdullayev dedi ki, bu gün rayonun fermerləri yarmarkada satışa 14 ton məhsul, o cümlədən 2,6 ton kələm, 300 kiloqramdan çox qoyun əti, 4 ton alma, nar çıxarmışlar.
Burada şəhər sakinləri bazardakından 20-30 faiz ucuz qiymətlərə satılan məhsulları həvəslə alırdılar.
Binəqədi rayonundakı 6 nömrəli Bakı Texniki Peşə liseyinin qarşısında təşkil olunmuş yarmarkada Ağstafa, Bərdə və Goranboy rayonlarının fermerləri də ucuz qiymətlərə meyvə-tərəvəz və süd məhsulları satırdılar.
Rayon üzrə müvafiq işçi qrupunun rəhbəri Sabir Əhədov bildirmişdir ki, bu gün yarmarkalara ümumilikdə, 60 tondan artıq kənd təsərrüfatı məhsulları gətirilmişdir.
Bölmənin digər xəbərləri
