BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 14 fevral (AZƏRTAC). Fevralın 14-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
“Təzə bazar” MMC-nin həyətindəki yarmarkada alıcıların və satıcıların rahatlığı üçün hər cür şərait yaradılmış, məhsulların keyfiyyəti sanitariya-gigiyena nəzarətindən keçirilmişdı. Burada şəhər sakinlərinə Sabirabad, Zərdab, Gədəbəy və digər rayonlardan gətirilmiş 14 tondan çox məhsul, o cümlədən 2,5 ton ət, 0,3 ton ağartı, 4,5 ton tərəvəz, 4 ton meyvə, 3 ton kartof, 3,5 min ədəd yumurta, 50 kiloqram bal təklif olunurdu. Gədəbəyli Kamran Əliyev yarmarkaya gətirdiyi 3 ton alma, armud və narı münasib qiymətə satırdı. O, hər həftə yarmarkaya məhsul gətirəcəyini bildirdi. Alıcı Cavid Hüseynovun sözlərinə görə, yaxın ərazidə yaşadığından hər həftə buradan bazarlıq edir. Məhsulların qiyməti münasib, keyfiyyəti isə yüksəkdir.
A.Şərifzadə küçəsində, metronun “İnşaatçılar” stansiyasının yaxınlığındakı yarmarkada şənbə günü səhər tezdən qələbəlik hökm sürürdü. Mülayim hava şəraiti Quba, Qusar, Salyan, Dəvəçi, Astara, İmişli və digər rayonların fermerləri və şəxsi təsərrüfat sahiblərinə satışa daha çox və müxtəlif çeşidli məhsul çıxarmalarına imkan yaratmışdı. Burada paytaxt sakinlərinə bazar qiymətlərindən xeyli ucuz ət, ağartı, kartof, soğan, sitrus meyvələri, alma, nar, heyva, toyuq əti, yumurta, kələm, balqabaq, göyərti və s. təklif edirdilər.
Yarmarkaya 69 ton məhsulun çıxarıldığını bildirən Kənd Təsərrüfatı Nazirliyinin nümayəndəsi Vahid Zərgərov, bütün məhsullarin keyfiyyətinin ciddi surətdə yoxlanıldığını, xüsusilə ət məhsullarının baytar müayinəsindən keçirildiyini diqqətə çatdırmışdır. Bu gün də Salyan rayonundan gətirilmiş mal və qoyun əti üçün növbə yaranmışdır.
Alıcılar burada yaradılan şəraitdən, məhsulun bolluğundan və qiymətlərin münasibliyindən razılıq edirdilər.
Badamdar qəsəbəsinin mərkəzində, 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkaya əsasən Ağdaş, Salyan, Sabirabad, Masallı, Quba və digər rayonlardan 15 tondan çox kənd təsərrüfatı məhsulları gətirilmişdi. Burada Giləzi Quşçuluq Fabrikindən gətirilmiş 5400 ədəd yumurta 10 qəpiyə satılırdı. Masallıdan kartof gətirmiş yerli fermer Mehman Qafarov dedi ki, az vaxt ərzində burada 7 ton məhsul satmışdır. 40 qəpiyə təklif etdiyi kartofu qəsəbə sakinləri yüksək həvəslə alırlar. M.Qafarov bildirdi ki, hələ satılası 10 tondan çox məhsulu var və hər həftə bura kartof gətirəcəkdir.
Qəsəbə sakinləri Fuad Balayev, Dadaş Qocayev, Bahadur Cəfərov və başqaları yarmarkaların davamlı təşkilinə görə minnətdarlıqlarını bildirirdilər.
Metronun “Əhmədli” stansiyasının yaxınlığında, “Azər” ticarət mərkəzində təşkil edilmiş yarmarkada şəhər sakinləri bazardakından xeyli ucuz olan məhsulları həvəslə alırdılar. Yarmarkada Qəbələ, Qax, Ağcabədi, Biləsuvar, Quba, Salyan, Kürdəmir və Şəmkir rayonlarının fermerləri alıcılara almanın kiloqramını 30, kartof və soğanı 40 qəpiyə təklif edirdilər. Kənd Təsərrüfatı Nazirliyinin nümayəndəsi Namiq Qüdrətov bildirdi ki, bu gün satışa 254,5 ton məhsul çıxarılmışdır.
Suraxanıda “Günəş” ticarət mərkəzindəki yarmarkaya Gədəbəy, Samux, Daşkəsən, Quba, Biləsuvar rayonlarının fermerləri 49 tondan çox, “Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkaya isə cəlilabadlılar 9 tona yaxın məhsul gətirmişdilər. Məhsullar arasında qiymətləri bazarlardakından 40-50 faiz ucuz olan kartof, soğan, yerkökü, kələm, balqabaq, ət, süd məhsulları, alma, qoz, fındıq, göyərti, istixana şəraitində yetişdirilmiş pomidor, xiyar və s. çoxluq təşkil edirdi. Burada yumurtanın biri 7-10 qəpiyə, almanın kiloqramı 30-70 qəpiyə, qoz 2 manata, qoz ləpəsi 3-6 manata, şabalıd 1 manat 50 qəpik-4 manata, qoyun əti 5 manat-6 manata, mal əti 4 manat 60 qəpiyə, quş əti 3 manat -3 manat 80 qəpiyə satılırdı.
Kənd təsərrüfatı nazirliyinin əməkdaşı Mustafa Rüstəmov demişdir ki, yarmarkada alıcılara təklif olunan məhsulların qiyməti bazarlarla müqayisədə 45-55 faiz aşağıdır.
Qazax Rayon İcra Hakimiyyətinin nümayəndəsi İman Məmmədovun verdiyi məlumata görə, Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada satışa Qazax və Ağsu rayonlarından gətirilmiş 18,7 ton məhsul - meyvə-tərəvəz, bostan və süd məhsulları çıxarılmışdır. Bu məhsullar alıcılara bazardakından ucuz qiymətlərə təklif olunur.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada Ağstafa, Goranboy və Bərdə fermerlərinin keyfiyyətli və ucuz qiymətə satdıqları məhsullar həvəslə alınırdı.
Nərimanov rayonunun Ə.Əliyev küçəsindəki yarmarkaya Xaçmaz, İmişli, Tərtər, Tovuz, Oğuz, Astara rayonlarından 35,2 ton kənd təsərrüfatı məhsulları gətirilmişdi. Kənd Təsərrüfatı Nazirliyinin nümayəndəsi Fərhad Quliyevin verdiyi məlumata görə, Xaçmaz fermerləri satışa 15,4 ton, tərtərlilər 11,1 ton, imişlilər 3 ton, tovuzlular 5, astaralılar isə 1,5 ton məhsul çıxarmışlar.
Xaçmazın Mollaoba kəndindən fermer Etibar Fərzəliyev 3 tona yaxın alma gətirdiyini və məhsulunu yarmarkada maneəsiz satdığını söyləmişdir.
######
Bölmənin digər xəbərləri
