BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
Bakı, 21 fevral (AZƏRTAC). Fevralın 21-də Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz məhsulları çıxarılmışdı.
“Təzə bazar” MMC-nin həyətindəki yarmarkada əhaliyə Sabirabad, Zərdab, Gədəbəy və digər rayonlardan gətirilmiş 17 tondan çox müxtəlif çeşidli kənd təsərrüfatı məhsulu təklif olunurdu. Sabirabadlı fermer Rauf Qasımov hər həftə buraya məhsul gətirir. Deyir ki, bu dəfə 400 kiloqramdan çox mal əti gətirmişdir. Kiloqramını 4 manat 20 qəpiyə deyir. Yaradılan şəraitdən razıdır.
Burada məhsulların bolluğu və ucuzluğu diqqəti cəlb edirdi. Qoyun ətinin kiloqramı 4 manat 50 qəpiyə, quş əti 3 manat 60-4 manata, xurma 60-80, kök, kələm, çuğundur 40-50, kartof, soğan, balqabaq 30-40, yumurtanın biri 9 qəpiyə satılırdı.
A.Şərifzadə küçəsində, metronun “İnşaatçılar” stansiyasının yaxınlığındakı yarmarkada şənbə günü səhər tezdən əsl qələbəlik hökm sürürdü. Günəşli və mülayim hava şəraiti alış-veriş üçün əla şərait yaratmışdı. Həmişə olduğu kimi, bu dəfə də yarmarkada satılan məhsullar arasında Quba, Qusar, Salyan, Dəvəçi, Astara, İmişli və digər rayonların fermerlərinin təsərrüfatlarından gətirilmiş məhsullar çoxluq təşkil edirdi. Kənd Təsərrüfatı Nazirliyinin nümayəndəsi Vahid Zərgərov bildirdi ki, fermerlər və şəxsi təsərrüfat sahibləri satışa 70 ton məhsul çıxarmışlar. Bütün məhsulların keyfiyyəti ciddi surətdə yoxlanılır, ət məhsulları baytar müayinəsindən keçirilir. Bunun nəticəsidir ki, Salyan rayonunun Qızılağac kəndindəki “Qırxçıraq” fermer təsərüfatından gətirilmiş mal və qoyun əti üçün böyük növbə yaranmışdı. Fermer Zöhrab Böyükağa oğlunun dediyinə görə, əti bazardakından xeyli aşağı qiymətə - mal ətini 4 manat 50 qəpiyə, qoyun ətini isə 5 manat 60 qəpiyə satır.
Budəfəki yarmarkada da sahibkarlar paytaxt sakinlərinə bazar qiymətlərindən xeyli ucuz müxtəlif çeşidli ağartı məhsulları, kartof-soğan, sitrus meyvələri, alma, nar, heyva, toyuq əti, diri balıq, yumurta, kələm, balqabaq, göyərti və s. təklif edirdilər.
Badamdar qəsəbəsinin mərkəzində, 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkaya Ağdaş, Salyan, Sabirabad, Masallı, Quba və digər rayonlardan satışa 19 tondan çox kənd təsərrüfatı məhsulları çıxarılmışdı. Giləzi və Hacıqabul quşçuluq fabriklərindən isə 16 min 200 ədəd yumurta gətirilmişdi. Yarmarkada kartofun kiloqramı 40 qəpiyə, soğan 30, kələm 40-50, alma 30-40 qəpiyə, quş əti 3 manat 50, mal əti 4 manat 50 qəpiyə satılırdı.
Metronun “Əhmədli” stansiyasının yaxınlığında, “Azər” ticarət mərkəzində təşkil edilmiş yarmarkada paytaxt sakinləri bazardakından xeyli ucuz olan məhsulları həvəslə alırdılar. Kənd Təsərrüfatı Nazirliyinin nümayəndəsi Namiq Qüdrətov bildirdi ki, bu gün alıcılara Qəbələ, Qax, Ağcabədi, Biləsuvar, Quba, Salyan, Kürdəmir və Şəmkir rayonlarından gətirilmiş 252,2 ton alma, nar, naringi, kartof, soğan, kök, qoz, bal və heyvandarlıq məhsulları təklif olunur.
Suraxanıda “Günəş” ticarət mərkəzindəki yarmarkada Samux, Daşkəsən, Quba, Biləsuvar və digər rayonlardan gətirilmiş 52 tondan çox məhsul satılırdı. Məhsullar arasında kartof, soğan, yerkökü, kələm, balqabaq, ət, süd məhsulları, göyərti, alma, qoz, fındıq, habelə istixana şəraitində yetişdirilmiş pomidor, xiyar və s. çoxluq təşkil edirdi. Burada almanın kiloqramı 40-70 qəpiyə, qoz 2 manat, qoz ləpəsi 3-6 manata, şabalıd 1 manat 50 qəpik-4 manata, xurma 30-80 qəpiyə, qoyun əti 5 manat-5 manat 50 qəpiyə, quzu əti 6 manata, mal əti 4 manat 60 qəpiyə, quş əti 3 manat-3 manat 80 qəpiyə, yumurtanın biri 7-10 qəpiyə satılırdı.
Qubalı fermer Dəyanət Hacıyev hər həftə yarmarkaya keyfiyyətli məhsul gətirdiyini və bazar qiymətlərindən ucuz satdığını bildirdi.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerləri sakinlərə 9 tona yaxın məhsul təklif edirdilər. Yarmarkaya 63 tona yaxın məhsulun çıxarıldığını bildirən Kənd Təsərrüfatı Nazirliyinin nümayəndəsi Mustafa Rüstəmov bütün məhsulların keyfiyyətinin ciddi surətdə yoxlanıldığını, xüsusilə ət məhsullarının baytar müayinəsindən keçirildiyini diqqətə çatdırmışdır.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada kələmin kiloqramı 40, soğan və kartof 30, xiyar 80 qəpiyə satılırdı. Sakinlər qiymətləri bazardakından 25-30 faiz ucuz olan meyvə-tərəvəzi, süd və bostan məhsullarını da həvəslə alırdılar.
Kənd Təsərrüfatı Nazirliyinin nümayəndəsi Qalib Hacızadə bildirdi ki, bu gün Ağsu və Qazax rayonlarından yarmarkaya 18 tondan artıq məhsul gətirilmişdir.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada şəhər sakinlərinə Ağstafa, Bərdə və Goranboydan gətirilmiş kənd təsərrüfatı məhsulları ucuz qiymətlərə təklif edilirdi.
Kənd Təsərrüfatı Nazirliyinin nümayəndəsi Fərhad Eminovun verdiyi məlumata görə, Nərimanov rayonunun Ə.Əliyev küçəsindəki yarmarkada şənbə günü Xaçmaz fermerləri satışa 25,1 ton, tərtərlilər 11,6, imişlililər 3,2, tovuzlular 4, astaralılar isə 1,5 ton, bütünlükdə 46,5 ton məhsul çıxarmışdılar. Giləzi broyler fabrikinin nümayəndəsi Elnur Hüseynov hər həftə olduğu kimi, bu gün də yarmarkaya 2 min yumurta gətirmişdi. İmişli Rayon İcra Hakimiyyətinin nümayəndəsi Cavad Musayev rayonun fermerlərinin Novruz bayramının yaxınlaşması ilə əlaqədar paytaxt sakinlərinə müxtəlif çeşidli quru meyvələr təklif etdiyini bildirdi.
Nərimanov Rayon İcra Hakimiyyətinin və Kənd Təsərrüfatı Nazirliyinin nümayəndələri yarmarkada qayda-qanuna nəzarət edirdilər.
######
 |
 |
Bölmənin digər xəbərləri
