Bakıda “Startup günləri”
Noyabrın 14-də Bakıda “Startup günləri”nə start veriləcək. Məqsəd ölkədə internet biznesin inkişafına təkan vermək, milli startup infrastrukturunu inkişaf etdirmək, yeni startupların yaradılmasına kömək göstərmək və startupçılar arasında əlaqələri gücləndirməkdən ibarətdir.
Təşkilat Komitəsindən AZƏRTAC-a bildirilib ki, “Startup günləri” çərçivəsində “Milli startuplara dövlətin və özəl sektorun dəstəyi” mövzusunda konfrans, eyni zamanda gənc və yeni başlayan startupçilar üçün beynəlxalq ekspertin iştirakı ilə təlimlər keçiriləcək. Əsas tədbirlərdən biri də startupçıların biznes ideyalarının və yeni internet layihələrinin ilkin variantlarının yarışması olacaq. Startupçılar innovativ biznes ideyalar ətrafında komandalar formalaşdıracaq, mentorların və ekspertlərin köməyi ilə yeni layihələrinin ilkin variantlarını hazırlayacaqlar. Yekunda bu layihələrin təqdimatı və müsabiqəsi təşkil olunacaq. Qaliblərə və fərqlənənlərə qiymətli hədiyyələr, diplomlar və sertifikatlar veriləcək.
“Startup günləri”nə Rabitə və Yüksək Texnologiyalar Nazirliyi, Yüksək Texnologiyalar Parkı, “Cybernet”, “Sinam”, “Smart Systems” və “Khazar Ventures” şirkətləri dəstək verirlər.
Bölmənin digər xəbərləri
