BALAKƏNLİ GƏNCLƏR İCTİMAİ-SİYASİ PROSESLƏRDƏ FƏALLIQ GÖSTƏRİRLƏR
AZƏRTAC-ın müxbiri xəbər verir ki, Azərbaycan Respublikası Gənclər və İdman Nazirliyi yaradılmasının 13-cü ildönümü münasibətilə iyulun 24-də Balakən şəhərində bayram tədbiri keçirilmişdir.
Ümummilli liderimiz Heydər Əliyevin adını daşıyan bağda təşkil olunan bayram şənliyini rayon gənclər və idman idarəsinin rəisi Səfər Gəncəyev açaraq əlamətdar gün münasibətilə rayon gənclərini təbrik etmiş, ulu öndərin diqqət və qayğısı ilə 1994-cü ilin iyulunda yaradılan Gənclər və İdman Nazirliyinin bu gün ölkəmizdə gənclər siyasəti və gənclər hərəkatının əlaqələndiricisi kimi böyük uğurlar qazandığını xüsusi vurğulamışdır. Ümummilli liderin gənclər siyasəti sahəsində başladığı məqsədyönlü işin hazırda Prezident İlham Əliyev tərəfindən uğurla davam etdirildiyini bildirən idarə rəisi, gənclərin hərtərəfli inkişafını təmin etmək məqsədi ilə 2002-ci ildə “Gənclər siyasəti haqqında” Azərbaycan Respublikası qanununun qəbul edildiyini, 2005-ci ildən 2009-cu ilədək dövrü əhatə edən “Azərbaycan Gəncliyi Dövlət Proqramı”nın təsdiq olunduğunu, habelə bir sıra fərman və sərəncamların imzalandığını nəzərə çatdırmışdır.
Bayram şənliyində çıxış edən rayon mədəniyyət şöbəsinin müdiri Ruqiyyə Seyidova və başqaları balakənli gənclərin elm, təhsil, mədəniyyət və idman sahələrində qazandıqları uğurlardan söz açmış, onların ictimai-siyasi proseslərdə fəallıq göstərdiklərini bildirmişlər.
Gənc istedadların, bədii özfəaliyyət kollektivlərinin iştirakı ilə keçən bayram şənliyi bir neçə saat davam etmişdir.
Bölmənin digər xəbərləri
