“Balxurma” müəssisəsi tezliklə Hollandiya, Litva və Rusiyaya məhsul ixracına başlayacaq
Balakən, 8 fevral, Mustafa Dadaşov, AZƏRTAC
Prezident İlham Əliyevin rəhbərliyi ilə son illər ölkəmizdə qeyri-neft məhsullarının ixracının stimullaşdırılması, rəqabətqabiliyyətli məhsulların istehsalı və ixracının artırılması istiqamətində həyata keçirilən məqsədyönlü tədbirlər bölgələrdə də yeni istehsal sahələrinin yaradılmasına diqqəti artırıb. 2017-ci ildə Balakən rayonunun Katex kəndində “Balxurma” MMC-nin meyvə və giləmeyvələrin quru və yarımquru emalı müəssisəsinin fəaliyyət başlaması yerli məhsulların “Made in Azerbaijan” brendi ilə xarici bazarlarda təşviqi istiqamətində ölkədə aparılan iqtisadi siyasətin bariz nümunəsidir.
“Balxurma” MMC-nin icraçı direktoru İsfəndiyar İsfəndiyarov AZƏRTAC-ın bölgə müxbirinə müsahibəsində müəssisənin fəaliyyəti, əldə olunan ilk uğurlar və gələcək planlar barədə məlumat verib.
Müsahibimiz bildirib ki, xurma Balakəndə ən çox istehsal olunan meyvədir. Hər il rayonda 15 min tona yaxın xurma istehsal olunur. Yeni fəaliyyətə başlayan müəssisə xurmanın satışında yaranan problemlərin həllini aradan qaldırmağa, daxili və xarici bazarlara qablaşdırılmış formada yüksək keyfiyyətli məhsullar çıxarmağa imkan verəcək.
Həftəlik istehsal gücü 20 ton olan bu emal müəssisəsi müasir standartlara cavab verən avtomatlaşdırılmış texniki avadanlıqla təchiz edilib. Müəssisədə emal olunan xurma rayon sakinlərinin şəxsi bağlarından yığılan tam gigiyenik və ekoloji cəhətdən təmiz məhsuldur. Həmin ərazidə bir neçə il əvvəl fəaliyyətə başlayan, 2 min ton tutuma malik soyuducu anbar kompleksi müəssisənin xammala olan tələbatının stabil və uzun müddətli təmin etməyə imkan verir.
Direktorun bildirdiyinə görə, “Balxurma” müəssisəsi qida təhlükəsizliyi sahəsində “İSO 22000” beynəlxalq sertifikatını alıb. Bu sertifikat müəssisə üçün dünya və Avropa bazarlarına çıxış imkanları yaradır. Bundan əlavə, beynəlxalq səviyyəli laboratoriyalar tərəfindən verilən sertifikat və rəylər də müəssisənin istehsal etdiyi məhsulların dünya bazarlarında ciddi rəqabət şəraitində davam gətirməsinə zəmanət verir.
Fəaliyyətə başlamasından az müddət keçməsinə baxmayaraq, müəssisənin artıq müəyyən uğurlara imza atdığını vurğulayan İsfəndiyar İsfəndiyarov deyib: “Berlin, Dubay, Şanxay şəhərlərində, həmçinin Bakıda keçirilən ərzaq sərgilərində məhsulumuzun keyfiyyəti iştirakçılar tərəfindən yüksək qiymətləndirilib. Ötən ilin sentyabrında Moskvada keçirilən “WorldFood Moskow” Beynəlxalq Ərzaq Sərgisində “Made in Azerbaijan” vahid ölkə stendində öz təbii və keyfiyyətli məhsulları ilə ziyarətçilərin və sərgi təşkilatçılarının diqqətini cəlb edən müəssisəmiz 2017-ci ilin məhsulu nominasiyası üzrə qızıl medala layiq görülüb. Onu da qeyd edim ki, quru meyvə istehsalı və emalı sahəsində yalnız Azərbaycan şirkətləri - “Balxurma” və fındıq istehsalçısı “Azərstar” sərginin təşkilatçıları tərəfindən mükafatlandırılıb. Müəssisəmizin bu mükafata layiq görülməsi məhsullarımızın ekoloji təmiz olması, həmçinin istehsal və emal prosesinin müasir texnologiyalara əsaslanması ilə bağlıdır”.
Müəssisə rəhbəri bildirib ki, məhsul satışı ilə bağlı artıq Avropanın bir sıra ölkələri ilə müqavilələr bağlanılıb. Müqavilə əsasında bir neçə gündən sonra Hollandiya, Litva və Rusiyaya ilk məhsul ixracına başlanılacaq. Hazırda 100 nəfər işçinin çalışdığı bu emal müəssisəsində gələcəkdə xurmadan doşab və cem istehsal olunması, həmçinin 14 növ meyvə və giləmeyvənin quru və yarımquru emal edilməsi nəzərdə tutulur.
Bölmənin digər xəbərləri
