Banklar tərəfindən daşınmaz əmlakın qeydiyyatı zamanı qarşıya çıxan məsələlər müzakirə edilib
Bakı, 23 dekabr, AZƏRTAC
Azərbaycan Banklar Assosiasiyası (ABA) ilə Daşınmaz Əmlakın Dövlət Reyestri Xidməti (DƏDRX) arasında onlayn görüş keçirilib.
ABA-dan AZƏRTAC-a bildirilib ki, görüşdə banklar tərəfindən daşınmaz əmlakın qeydiyyatı və balansa keçirilməsi zamanı qarşıya çıxan məsələlər müzakirə edilib. Bu məsələlərin operativ və vaxtında həlli məqsədilə hər iki qurumun nümayəndələrindən ibarət İşçi Qrupunun yaradılması, eyni zamanda, bu kimi müzakirələrin və konstruktiv dialoqun gələcəkdə də daha intensiv şəkildə davam etdirilməsi qərara alınıb.
Qeyd edək ki, Azərbaycan Banklar Assosiasiyası 1990-cı ildə kommersiya bankları tərəfindən təsis edilib. ABA-nın əsas məqsədi üzv-təşkilatların maraqlarını qorumaq, onların müxtəlif növ işgüzar xidmətlərə olan ehtiyaclarının ödənilməsinə yardım göstərmək və fəaliyyətlərini əlaqələndirməkdən ibarətdir. Hazırda 26 bank və 5 qeyri-bank təşkilatı ABA-nın üzvüdür.
Bölmənin digər xəbərləri
