Banqladeşdə parlament seçkisində hakim Xalq Liqası Partiyası qalib olub
Pekin, 8 yanvar, AZƏRTAC
Banqladeşdə yanvarın 7-də keçirilmiş ölkə tarixinin 12-ci parlament seçkisində hakim Xalq Liqası (Avami Liqası) Partiyası qalib olub.
AZƏRTAC Banqladeşin Mərkəzi Seçki Komissiyasının məlumatına istinadla xəbər verir ki, ilkin nəticələrə əsasən hakim partiya parlamentdəki yerlərin 70 faizdən çoxunu (165 yer) qazanıb. Müstəqil namizədlər 49, müxalif Catiya Partiyası 9 yer qazanıb. Digər dairələr üzrə səslərin sayılması davam edir. Banqladeş qanunvericiliyə görə 300 yerlik parlamentdə ən azı 151 yer qazanan siyasi partiya hökuməti qurmaq hüququ qazanır. Beləliklə, hazırkı Baş nazir xanım Şeyx Hasinanın liderlik etdiyi Xalq Liqası Partiyası 4-cü dəfə hökuməti qurmaq şansı qazanıb. Xalq Liqası Partiyası bundan əvvəl 2009, 2014 və 2018-ci ildəki parlament seçkilərində qalib olub.
Qeyd edək ki, səsvermə hüququ olan seçicilərin təxminən 40 faizi 42 mindən çox məntəqə üzrə səsvermədə iştirak edib. Səsvermə yerli vaxtla səhər saat 8:00-da başlayıb və 16:00-dək davam edib. Parlamentdəki 300 yerdən 299-u uğrunda 1970 namizəd mübarizə aparıb. Onlardan 1534 nəfəri 28 siyasi partiyanı təmsil edən, 436-sı isə müstəqil namizəd olub. Sonuncu deputat yeri üçün seçki müstəqil namizədin vəfatı ilə əlaqədar daha sonra keçiriləcək. Seçkini 30 min müşahidəçi və jurnalist izləyib.
Mərkəzi Seçki Komissiyasının sədri Kazi Habibul Aval mətbuat konfransında bildirib ki, seçki ümumən sakit və demokratik atmosferdə keçib.
Yerli media isə seçkinin insidentsiz ötüşmədiyini yazır. Belə ki, səsvermə prosesi başlayandan sonra ölkənin müxtəlif yerlərində toqquşmalar olub. Munşiqanc-Sadar rayonundakı toqquşmada müstəqil namizədin tərəfdarları hakim partiyanın namizədini dəstəkləyəni kəsici silahla öldürüb. Amma Mərkəzi Seçki Komissiyası bu hadisənin seçki ilə əlaqəli olmadığını bəyan edib. Çattoqram şəhərində isə polislə Banqladeş Milliyyətçi Partiyasının (BNP) üzvləri arasında toqquşma olub. Polis bir neçə seçki məntəqəsinin yaxınlığında baş verən toqquşmaları yatırtmaq üçün rezin güllələrdən istifadə edib.
Hələ yay aylarında küçə etirazları kampaniyasına başlayan ölkənin ən böyük müxalif qüvvəsi olan BNP və onun müttəfiqləri seçkiləri boykot edib. Bundan başqa, 28 namizəd, o cümlədən Catiya Partiyasının 3 namizədi səsvermə nəticələrinin saxtalaşdırılması iddiası ilə seçkini boykot etdiklərini açıqlayıblar. Mərkəzi Seçki Komissiyası Xalq Liqası Partiyasının Çattoqram şəhəri üzrə namizədi Mustafizur Rəhmanı seçki davranış qaydalarını pozduğuna görə seçkidən kənarlaşdırıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
