BDU-da Nəsiminin 650 illik yubileyinə həsr olunmuş beynəlxalq simpozium keçirilib
Bakı, 24 oktyabr, AZƏRTAC
Bakı Dövlət Universitetində (BDU) bu ali məktəbin və Türkiyənin Sivas Universitetinin birgə təşkilatçılığı ilə xalqımızın çoxəsrlik ənənələrə malik bədii və fəlsəfi fikrində xüsusi rol oynamış İmadəddin Nəsiminin anadan olmasının 650 illik yubileyi münasibətilə “Türk dünyasının mədəniyyət səfirləri: Nəsimi” beynəlxalq simpoziumu keçirilib.
AZƏRTAC xəbər verir ki, tədbiri universitetin elm və innovasiyalar üzrə prorektoru, professor Aydın Kazımzadə açaraq böyük mütəfəkkir İmadəddin Nəsiminin Şərq və Qərb xalqlarının mədəniyyətində və ədəbiyyatındakı mühüm rolundan bəhs edib. Aydın Kazımzadə Prezident İlham Əliyevin “Böyük Azərbaycan şairi İmadəddin Nəsiminin 650 illik yubileyinin qeyd edilməsi haqqında” 2018-ci il 15 noyabr tarixli Sərəncamını xatırladıb. Sərəncama əsasən keçirilən çoxsaylı tədbirlərdən danışan prorektor bugünkü simpoziumu ortaq dəyərlərə olan münasibət kimi qiymətləndirib, onun işinə uğurlar arzulayıb.
Tədbirdə çıxış edən BDU-nun rektoru Elçin Babayev ümummilli lider Heydər Əliyevin təşəbbüsü ilə dahi Azərbaycan şairinin irsinin ölkəmizdə sistemli tədqiqi və təbliği istiqamətində görülən işlərdən söz açıb. Prezident İlham Əliyevin müvafiq Sərəncamı ilə İmadəddin Nəsiminin 650 illik yubileyi münasibətilə 2019-cu ilin ölkəmizdə “Nəsimi ili” elan edildiyini vurğulayıb. 2017-ci ildə UNESKO-nun Parisdəki baş qərargahında böyük söz ustadının vəfatının 600 illiyinin qeyd edildiyini xatırladan rektor ölkəmizdə ilk dəfə Nəsimi şeir, incəsənət və mənəviyyat festivalının keçirildiyini söyləyib.
Elçin Babayev əsərlərində mədəni müxtəlifliyi, humanist ideyaları əks etdirən Nəsiminin bütün türk dünyasının fəxri olduğunu vurğulayıb, böyük ortaq dəyərlər əsas götürülərək BDU və Sivas Universitetinin təşkilatçılığı ilə keçirilən simpoziumun onun zəngin irsinin daha yaxşı öyrənilməsinə imkan yaradacağına, elmi, ədəbi və mədəni əlaqələrimizin inkişafına xüsusi töhfə verəcəyinə əminliyini bildirib. Rektor deyib ki, Nəsimi yaradıcılığına lirik şeirlərlə başlasa da, sonradan ictimai-siyasi mövzularda kifayət qədər çox əsərlər yaradıb və o, sözün əsl mənasında, fəlsəfi qəzəlin banisi kimi tarixə düşüb.
Nəsimi yaradıcılığının Azərbaycan dilinin tarixini, inkişafını öyrənmək baxımından da əhəmiyyət kəsb etdiyini deyən rektor dahi şairin ən böyük işlərindən biri kimi ana dilində yazıb-yaratmasını və özündən sonra bir məktəb yaratmasını xüsusi vurğulayıb.
Rektor Nəsiminin 650 illik yubileyi ilə əlaqədar Azərbaycanın Birinci vitse-prezidenti Mehriban Əliyevanın 650 min ağacın əkilməsi ilə bağlı təşəbbüsündən danışaraq onun ekoloji, siyasi və mənəvi baxımdan xüsusi əhəmiyyət daşıdığını və BDU-nun bu aksiyada fəal iştirak edəcəyini qeyd edib. Heydər Əliyev Fondunun vitse-prezidenti Leyla Əliyeva tərəfindən yubileylə əlaqədar çox gözəl təşəbbüslər irəli sürüldüyünü vurğulayan Elçin Babayev ölkə üzrə bu cür tədbirlərin davam etməkdə olduğunu diqqətə çatdırıb.
Sonra Sivas Cümhuriyyət Universitetinin rektoru, professor Alim Yıldız Azərbaycanla Türkiyə arasında ortaq dəyərlərdən danışıb və XIV əsr türk dünyasının böyük şairlərindən olan Nəsimi ilə bağlı keçirilən simpoziumun gələcək əməkdaşlığa xüsusi töhfə verəcəyini qeyd edib.
Filologiya fakültəsinin dekanı Elçin Məmmədov isə Azərbaycan klassiklərinin zəngin irsinin öyrənilməsində dövlət dəstəyindən söz açıb, simpoziumun verəcəyi faydalardan danışıb.
Türkiyə səfirliyinin təhsil müşaviri Nihad Büyükbaş, Türk Əməkdaşlıq və Koordinasiya Agentliyinin Bakı nümayəndəliyinin əlaqələndiricisi Teoman Tiryaki, Türkiyə və Azərbaycan İş Adamları və Sənayeçilər Birliyinin sədri Hüseyn Büyükfırat bütövlükdə türk dünyasının dahi şairi, mütəfəkkiri, filosofu Nəsimi ilə bağlı keçirilən simpoziumu yüksək qiymətləndirib, bölmə iclaslarında dinləniləcək məruzələrin onun zəngin irsinin daha dərindən öyrənilməsi baxımından səmərəli olacağını qeyd ediblər.
Sonra professor Bilal Kemikli “Sirri faş etmək: təsəvvüf şeiri və Nəsimi” mövzusunda məruzə ilə çıxış edib. Bildirib ki, əslində, Nəsimi sirri faş etmirdi, o şeirlərində həqiqəti deyirdi.
Simpozium işini bölmə iclasları ilə davam etdirib. Ümumilikdə səkkiz bölmədə 31 məruzə dinlənilib.
Bölmənin digər xəbərləri
