BELARUS MƏRKƏZİ SEÇKİ KOMİSSİYASİ MDB ÖLKƏLƏRİNDƏKİ HƏMKARLARINI SEÇKİLƏRƏ DƏVƏT ETMİŞDİR
AZƏRTAC-ın xüsusi müxbiri Belarus Teleqraf Agentliyinə (BELTA) istinadla xəbər verir ki, Belarusun Mərkəzi Seçki Komissiyası parlamentin Nümayəndələr Palatasına seçkiləri müşahidə etmək üçün MDB ölkələrinin MSK nümayəndələrini qəbul etməyə hazırlaşır. Bu barədə BELTA-nın müxbirinə Belarus MSK-nın sədri Lidiya Yermoşina məlumat vermişdir.
MSK Gürcüstan istisna olmaqla, bütün MDB ölkələrindəki həmkarlarına dəvət göndərmişdir. Bu, onunla bağlıdır ki, Gürcüstan heç vaxt Belarus müşahidəçilərini öz seçkilərinə dəvət etmir.
ATƏT-in Demokratik Təsisatlar və İnsan Hüquqları Bürosunun və MDB İcraiyyə Komitəsinin missiyaları seçkiləri müşahidə etmək üçün artıq Belarusa gəlmişlər. MDB nümayəndə heyətinin sayı 300 nəfərdən çox olacaqdır. Seçkiləri təxminən elə bu qədər ATƏT nümayəndəsinin müşahidə edəcəyi gözlənilir.
Bölmənin digər xəbərləri
