BƏRDƏDƏ FERMERLƏR QABAQCIL TEXNOLOGİYA TƏTBİQ EDIRLƏR
Bərdədə kənd təsərrüfatı məhsullarının istehsalı zamanı istifadə olunan qabaqcıl texnologiyanın tətbiqi diqqət mərkəzində saxlanılır.
AZƏRTAC-ın müxbiri xəbər verir ki, bu yaxınlarda Soğanverdilər kəndində quraşdırılmış kökyuyan maşın torpaq sahiblərinə həm pula, həm də vaxta qənaət etmək imkanı verir. Ukraynadan gətirilmiş yeni maşın saatda 5 ton kök yuya bilir.
Qeyd edək ki, kök istehsalının ən çətin mərhələlərindən biri onun yuyulmasıdır. İndiyə qədər fermerlər kökü kisələrə dolduraraq suyun içində yuyurdular. Yeni avadanlıq isə bu prosesi həm sürətləndirir, həm də daha ucuz başa gətirir. 15-20 nəfərin 2 gündə yuduğu 5 ton kökü, yeni avadanlıq 1 saat ərzində təmizləyir. Soğanverdilər bələdiyyəsinin sədri Rafiq Ələsgərovun verdiyi məlumata görə, əllə yuyulan hər ton kök 15 manata başa gəlirdisə, indi maşınla bu rəqəm vur-tut 4 manat təşkil edir.
Xatırladaq ki, hazırda Bərdə rayonunda min hektara qədər kök əkilir və hər hektardan ortalama 25 ton məhsul götürülür.
Bölmənin digər xəbərləri
