Bərdədə keçirilən imtahanlarda yeddi rayondan olan abituriyentlər iştirak ediblər
Bərdə, 13 may, Tahir Ağaməmmədov, AZƏRTAC
Mayın 13-də Dövlət İmtahan Mərkəzi (DİM) tərəfindən ali təhsil müəssisələrinə qəbul olmaq istəyən abituriyentlər üçün II və III ixtisas qrupları üzrə birinci qəbul imtahanı keçirilib.
DİM-in Bərdə regional bölməsindən AZƏRTAC-ın bölgə müxbirinə bildiriblər ki, Bərdə şəhərində keçirilən imtahanda bu rayondan, həmçinin Ağdam, Ağcabədi, Tərtər, Xocavənd, Beyləqan və Laçından olan 2114 abituriyent iştirak edib. Bərdə şəhər 5, 6, 8 nömrəli və Ağdam 12 nömrəli (Bərdədə) tam orta məktəblərində təşkil olunan imtahanlar 14 imtahan rəhbəri və 154 nəzarətçi-müəllim tərəfindən idarə olunub. Saat 11:00-da başlayan imtahanlar təlimata uyğun olaraq 3 saat davam edib və hər hansı qanun pozuntusuna yol verilmədən vaxtında başa çatıb.
Qeyd edək ki, imtahan materiallarının emalı başa çatdıqdan sonra nəticələr və hər bir abituriyentin cavab kartının qrafik təsviri imtahandan 3-4 gün sonra DİM-in internet saytında yerləşdiriləcək.
Bölmənin digər xəbərləri
