Bərdədə yeni futbol klubu yaradılıb, stadionun təmirə ehtiyacı var FOTO VİDEO
Bərdə, 15 noyabr, Tahir Ağaməmmədov, AZƏRTAC
Ölkəmizdə son illər idmanın digər növləri ilə yanaşı, futbol da inkişaf edir. Paytaxtla yanaşı, bölgələrdə də futbol klubları yaranır və ölkə çempionatlarında uğurla təmsil olunurlar. Uzun fasilədən sonra Bərdə rayonunda da futbol klubunun yaranması bərdəlilərin, futbolsevərlərin sevincinə səbəb olub. Lakin şəhər stadionu illərdir istifadəsiz qaldığından yararsız vəziyyətə düşüb.
AZƏRTAC-ın bölgə müxbiri "Bərdə" Futbol Klubunun oyunçu və məşqçi heyəti ilə görüşüb, onların təəssüratlarını öyrənib.
Bərdədə yeni futbol klubunun yaranmasına ən çox sevinənlərdən biri Zaur Əliyevdir. Hələ uşaq yaşlarından futbola böyük marağı olan Zaur 2007-2009-cu illərdə Azərbaycan çempionatının birinci divizionunda oynayan “ABN-Bərdə” komandasının qapıçısı olub. Rayonda yeni komandanın yaradılması xəbərini eşidəndə böyük sevinclə yenidən futbola qayıdıb.
“2002-ci ildə futbol üzrə dünya çempionatı keçirilirdi. O zaman 11 yaşım vardı. Türkiyənin oyunlarını izləyirdik. Məndə futbola maraq da həmin vaxtdan yarandı. Xüsusən türkiyəli qapıçı Rüştü Rəncbərin oyunu, - xüsusən də, onun gözünün altındakı işarə çox xoşuma gəlirdi, - məndə qapıçı olmaq həvəsi yaratdı. Həmin vaxtdan kənddə uşaqlarla futbol oynayanda özümü Rüştü Rəncbərə bənzədir, gözümün altını kömürlə rəngləyirdim. O vaxtdan futbol həyatımın bir parçasına çevrildi. 2005-ci ildə Bərdə rayon Uşaq-Gənclər İdman Məktəbində ilk dəfə uşaq futboluna gəldim. 2007-ci ildə “ABN-Bərdə” komandasına dəvət olundum. Komandanın ən gənc oyunçusu idim. Bu komanda mənim kimi gənc futbolçuların qabağa getmək üçün bir şans idi. 2009-cu ildə “ABN-Bərdə” komandası Azərbaycan çempionatının birinci divizionunda çempion oldu. Ancaq çox təəssüf ki, bir müddət sonra komandamız dağıldı, 13 il futbolsuz qaldıq. Stadion bərbad vəziyyətdə olsa da, bura gəlir, oynayırdıq. Nəhayət, bir neçə ay əvvəl xəbər gəldi ki, Bərdədə liqa üçün oyunçular yığılır. Köhnə futbolçular da, yeni uşaqlar da gəldik, məşqlərə qoşulduq. Komandamız üçün, Bərdədə futbolun inkişafı üçün əlimizdən gələni edəcəyik. Komandanın da əhvali-ruhiyyəsi yaxşıdır. Yoldaşlıq görüşləri keçirmişik. İnşallah, nailiyyət əldə edərik”, - deyə Zaur Əliyev bildirib.
Bərdə rayon Ağsaqqallar Şurasının sədri Yaşar Zamanov rayonda futbol klubunun yenidən yaradılmasını gənclərin zərərli vərdişlərdən uzaq olması baxımından yüksək qiymətləndirib: “Bərdədə 13-14 ili idi ki, futbol yox idi. Buna baxmayaraq, rayonda futbolsevərlər, futbol oynamaq istəyənlər çoxdur. Futbol ən kütləvi idman növüdür. Düşündük ki, gənclərin pis vərdişlərdən, narkomaniyadan uzaqlaşdırmaqda futbolun böyük rolu olar. Qərara gəldik ki, rayonda yenidən futbol komandası yaradaq. Bərdədəki keçmiş komandanın məşqçiləri, futbolçuları ilə danışdıq, AFFA-ya müraciət etdik. Beləliklə klub yarandı, AFFA-da qeydiyyatdan keçdi”.
Veteran futbolçu, “Bərdə” futbol klubunun baş məşqçisi Əli Quliyev bildirib ki, Bərdə şəhər stadionu 1981-ci ildə tikilib istifadəyə verilib. Müxtəlif illərdə Azərbaycan çempionatlarında çıxış edən Bərdəni təmsil edən “Pambıqçı” və “ABN-Bərdə” futbol komandaları öz oyunlarını bu stadionda keçirib. 2010-cu ildə Bərdədəki futbol komandası dağıldıqdan sonra stadion da istifadəsiz qalıb. Hazırda məşqçi və futbolçularla birlikdə stadionda müəyyən işlər gördüklərini deyən Ə.Quliyev qeyd edib ki, artıq 9 yoldaşlıq görüşü keçiriblər. Bu oyunların 8-də qalib gəliblər.
Rayon Ağsaqqallar Şurasının üzvü, Qarabağ Regional Futbol Federasiyasının rəhbəri Əliş Şərifov şəhər stadionunun təmirə ehtiyacı olduğunu söyləyib: “Bərdədə müxtəlif illərdə müxtəlif komandalar fəaliyyət göstərib. Bərdənin sayılıb-seçilən futbolçuları olub. Son 13 ildə isə Bərdədə futbol olmayıb. İndi “Bərdə” komandası yaratmışıq. Öz gücümüz hesabına stadionu təmir edirik. Lakin buranın əsaslı təmirə ehtiyac var. Köməklik olsa, daha yaxşı olar. Hazırda həvəskarlar liqasındayıq. Məqsədimiz 8 komandanın arasında çempion olub, ikinci dəstəyə vəsiqə qazanmaqdır”.
Bölmənin digər xəbərləri
