Berlində dəhşətli terror aktı törədilməsindən iki il keçir
Berlin, 20 dekabr, AZƏRTAC
Düz iki il bundan əvvəl Berlindəki Braytşaydplas meydanında dəhşətli terror aktı törədilmişdi. Çərşənbə günü bu hadisənin növbəti ildönümü ilə əlaqədar, Almaniya paytaxtı sakinləri həmin terror aktının qurbanlarının xatirəsini yad etmək üçün kayzer Vilhelm Memorial kilsəsinin yanında toplaşıblar.
AZƏRTAC xəbər verir ki, anım mərasimi bir dəqiqə sükutla və əklillər qoyulması ilə müşayiət olunub.
Federal kansler Angela Merkel və onun kabinetinin üzvləri terror aktı qurbanların qohumlarına və hadisə zamanı zərər çəkmişlərə başsağlığı veriblər.
Xatırladaq ki, bu Almaniyada ən böyük terror aktı idi. Sükanı arxasında Tunis vətəndaşı Anis Amrinin olduğu yük maşını Berlinin mərkəzində açılmış milad bazarında camaatın üstünə yerimiş, nəticədə 12 nəfər həyatdan məhrum olmuş, təxminən 50 adam yaralanmışdı.
Sonradan məlum oldu ki, bu hadisədən əvvəl həmin terrorçu yük maşınının sürücüsünü - Polşa vətəndaşı Lukaş Urbanı öldürərək onun maşınını ələ keçiribmiş.
Terrorçu özü isə dekabrın 23-də Milanda keçirilən xüsusi əməliyyatın gedişində məhv edilmişdi.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
