BƏSTƏKAR TOFİQ BAKIXANOVUN YARADICILIQ GECƏSİ
Gecədə mədəniyyət və turizm naziri adından Prezident mükafatçısı, əməkdar artist Azər Mirzəyev, SSRİ xalq artisti, bəstəkar Arif Məlikov, Gürcüstan Bəstəkarlar İttifaqının sədri, xalq artisti Vaja Ozaraşvili, İran İslam Respublikasının Azərbaycandakı səfiri Əfşar Süleymani çıxış edərək, görkəmli bəstəkarın həyat və yaradıcılığından danışmış və yubileyi münasibətilə onu təbrik etmişlər. Bəstəkarın əsərlərindən ibarət ikihissəli konsertdə Üzeyir Hacıbəyov adına Azərbaycan Dövlət simfonik orkestrinin (bədii rəhbər və baş dirijor, xalq artisti Rauf Abdullayev) ifasında Xocalı faciəsinə həsr olunmuş “Humayun” simfonik muğamı, Azərbaycan xalqının ümummilli lideri Heydər Əliyevin xatirəsinə həsr olunmuş “Həmişə bizimləsən” simfonik poeması (əsərlər ilk dəfədir ifa olunur), “Şərq poeması” baletindən 2-ci suita səslənmişdir. Əməkdar artist Həsən Enami “ Bağışla məni” və “Vətən nəğməsi” mahnılarını oxumuşdur. Əməkdar artist Töhfə Babayeva skripka və orkestr üçün caz üslublu 6 saylı konserti ifa etmişdir. Konsert bəstəkarın dahi Üzeyir Hacıbəyovun xatirəsinə həsr etdiyi tar və simfonik orkestr üçün 3 hissəli “Azərbaycan süitası”nın (əsər ilk dəfə ifa edilir) solist xalq artisti Ramiz Quliyev) ifası ilə başa çatmışdır.
Bölmənin digər xəbərləri
