“Beynəlxalq dəniz günü” ilə əlaqədar bölgələrdə ekoloji tədbirlər keçirilmişdir
Bakı, 25 sentyabr (AZƏRTAC). Hər il sentyabr ayının sonuncu həftəsi qeyd olunan “Beynəlxalq dəniz günü” ilə əlaqədar Ekologiya və Təbii Sərvətlər Nazirliyi respublikamızın Xəzərsahili şəhər və rayonlarında maarifləndirici tədbirləri davam etdirir.
Nazirliyin mətbuat xidmətindən AZƏRTAC-a bildirmişlər ki, növbəti tədbirlər Neftçala rayonunun 1, 2, 3 və 4 saylı orta məktəblərində, Neftçala şəhər və Qədimkənd bələdiyyələrində, həmçinin Salyan rayonunun Kürsəngi və Xıdırlı bələdiyyələrində keçirilmişdir.
“Xəzərin ekoloji mühitinin yaxşılaşdırılması istiqamətində görülən işlər, perspektivlər” mövzusunda keçirilən tədbirlərdə nazirliyin regional şöbələrinin mütəxəssisləri “Beynəlxalq dəniz günü”nün məqsədi, Xəzərin ekoloji problemlərinin həlli istiqamətində görülmüş işlər, qarşıda duran vəzifələr barədə şagirdlərə və yerli əhaliyə məlumat vermiş, onların suallarını cavablandırmışlar.
Eyni zamanda, ETSN-in, yerli bələdiyyələrin və ictimaiyyət nümayəndələrinin iştirakı ilə Neftçala rayonunun Xəzər dənizinin sahil zolağı boyu 3 kilometrlik ərazisində iməcilik keçirilmiş və sahə məişət tullantılarından təmizlənmişdir.
Bölmənin digər xəbərləri
