BEYNƏLXALQ ƏMƏK TƏŞKİLATI AZƏRBAYCANDA MƏŞĞULLUQ SAHƏSİNDƏ GÖRÜLƏN İŞLƏRİ YÜKSƏK QİYMƏTLƏNDİRİR
Nazir Əli Nağıyev oktyabrın 19-20-də Almaniyanın Lübek şəhərində keçirilən “Gənclərin məşğulluğu, səriştəliliyi və iştirakı: gələcəyin təminatı” mövzusunda XV Malente simpoziumunda iştirak etmişdir. Simpoziumda gənclərin məşğulluğunun yoxsulluğun azaldılmasına təsirinin araşdırılması diqqət mərkəzində olmuşdur. Tədbirin geniş iclaslarında və paralel işçi qruplarında iki əsas məsələ - əmək bazarının tələblərinə uyğunluq, kadrların seçilməsi və idarə edilməsi məsələləri müzakirə edilmişdir.
Simpoziumun ikinci günü Azərbaycan, İran, Misir, Braziliya, İndoneziya və digər ölkələrin nazirlərinin və yüksək vəzifəli şəxslərin iştirakı ilə “dəyirmi masa” keçirilmişdir. Bu tədbirdə çıxış edən nazir Əli Nağıyev qloballaşmanın dünya ölkələrinə, o cümlədən Azərbaycana təsiri, bunun müsbət və mənfi tərəfləri, Azərbaycan torpaqlarının 20 faizindən çoxunun işğala məruz qalması, 1 milyondan artıq qaçqın və məcburi köçkünün olmasına baxmayaraq, Azərbaycan Prezidenti tərəfindən məşğulluq siyasətinin uğurla həyata keçirilməsi, dövlətimizin başçısının hələ seçkiqabağı çıxışlarında 600 min yeni iş yerlərinin yaradılması ilə bağlı verdiyi vədə əməl etməsi və seçkilərdən ötən qısa müddət ərzində 70 mindən çox iş yerinin açılması barədə danışmış, beynəlxalq təşkilatların bu sahədə Azərbaycana dəstəyinin vacibliyini vurğulamışdır. O bildirmişdir ki, BƏT, BMT və Dünya Bankı birgə təşəbbüslə çıxış edərək gənclərin məşğulluğunun təmin edilməsini zəruri məsələ kimi qarşıya qoymuşlar. Azərbaycan Respublikasının Prezidenti də gənclərin məşğulluğuna xüsusi diqqət yetirir. Artıq Azərbaycanda Milli Məşğulluq Strategiyasının layihəsi hazırlanmış və Prezidentin İcra Aparatına təqdim olunmuşdur. Hazırda Milli Fəaliyyət Planının layihəsi üzərində də iş gedir.
