BEYNƏLXALQ KİNO ARXİVLƏRİ FEDERASİYASININ KÖMƏYİ İLƏ DÖVLƏT FİLM FONDUNA YENİ SƏNƏDLƏR DAXİL OLMUŞDUR
Azərbaycan Dövlət Film Fondunun təşəbbüsü və Beynəlxalq Kino Arxivləri Federasiyasının köməyi ilə fondun arxivi xeyli zənginləşmişdir.
AZƏRTAC xəbər verir ki, Azərbaycan bəstəkarlıq məktəbinin korifeylərindən biri, SSRİ xalq artisti, Dövlət mükafatı laureatı Fikrət Əmirovun Kanada və Rusiyada ayrı-ayrı şəxslərin arxivlərindəki fotoşəkilləri fondun arxivinə əlavə edilmişdir. Nadir fotosənədləri fonda Kanadada yaşayan musiqiçi həmyerlilərimiz təqdim etmişlər. Fondun direktoru, əməkdar incəsənət xadimi Cəmil Quliyev bildirmişdir ki, bəstəkarın həyat və yaradıcılığını əks etdirən sənədlər 70-ə yaxın fotoşəkildən ibarətdir.
Fonddan bildirmişlər ki, Fikrət Əmirov həm də “Səhər”, “Böyük dayaq”, “Sevil”, “Mən ki gözəl deyildim” kimi filmlərin bəstəkarıdır. Zəngin yaradıcılığı ilə musiqimizin inkişafında yeni mərhələ açan, Azərbaycan musiqisini dünyaya tanıdan bəstəkarın fotoşəkillərinin yerləşdirildiyi DVD artıq onun oğlu Cəmil Əmirova təqdim olunmuşdur.
Bölmənin digər xəbərləri
