Beynəlxalq konfransda Azərbaycanda dərsliklərin qiymətləndirilməsi texnologiyasına dair təqdimat olub
Bakı, 30 aprel, AZƏRTAC
Dövlət İmtahan Mərkəzinin (DİM) şöbə müdirləri Afiqə Batıyeva, Natiq Əliyev və sektor müdiri Cavanşir Orucov Qazaxıstanın Almatı şəhərində “Təhsil resurslarının modernləşdirilməsi: təcrübə və perspektivlər” mövzusunda beynəlxalq elmi-praktik konfransda iştirak ediblər.
Mərkəzdən AZƏRTAC-a bildirilib ki, konfransda Türkiyə, Rusiya, ABŞ, Böyük Britaniya, Macarıstan, Polşa, Özbəkistan və Qırğızıstanın, həmçinin Kembric, Makmillan və Pirsoon nəşriyyatlarının nümayəndələri təmsil olunublar.
Plenar iclasda təhsilin yenilənmiş məzmunu, Qazaxıstanda latın qrafikasına keçidlə bağlı məruzələr dinlənilib.
Seksiya iclaslarında Afiqə Batıyeva “Dövlət İmtahan Mərkəzində dərsliklərin qiymətləndirilməsinin və monitorinqinin aparılması texnologiyası”, Natiq Əliyev “Azərbaycanda pedaqoji kadrların hazırlanması təcrübəsi” mövzularında təqdimatlarla çıxış edib və sualları cavablandırıblar.
Səfər çərçivəsində DİM-in nümayəndələri Qazaxıstanda elektron dərslik və dərs vəsaitlərini hazırlayan “Milli İnformatizasiya Mərkəzi”ndə olublar.
Bölmənin digər xəbərləri
