BEYNƏLXALQ MÜNASİBƏTLƏR ŞURASINDA GÖRÜŞ
Görüşü ABŞ-ın keçmiş Prezidentinin milli təhlükəsizlik üzrə köməkçisi general Brent Skoukroft açdı. O, Azərbaycan Prezidenti İlham Əliyevin tərcümeyi-halı barədə məlumat verdi və bildirdi ki, Azərbaycan ABŞ-ın ən əsas strateji tərəfdaşlarından biridir. Cənab Skoukroft Ermənistan-Azərbaycan, Dağlıq Qarabağ münaqişəsi məsələsinə də toxunaraq dedi ki, Ermənistan silahlı qüvvələri tərəfindən Azərbaycanın ərazisi işğal olunmuşdur. O, münaqişənin həlli istiqamətində Azərbaycanın səylərini yüksək qiymətləndirdi və ölkəmizin haqlı mövqeyinin bundan sonra da dəstəklənəcəyini vurğuladı.
Prezident İlham Əliyev görüşdə nitq söylədi. Dövlətimizin başçısı dedi ki, Azərbaycan hələ inkişaf mərhələsini yaşayır. Vaxtilə, yəni müstəqilliyin ilk illərində Azərbaycanın vəziyyəti pis idi, vətəndaş müharibəsi baş vermiş, ölkə ağır siyasi-iqtisadi çətinliklərlə üzləşmişdi. Azərbaycanın müstəqil dövlət kimi mövcudluğu sual altında idi. Amma ümummilli lider Heydər Əliyevin hakimiyyətə qayıdışından sonra ölkədə ictimai-siyasi sabitlik bərqərar edildi və bir çox beynəlxalq layihələrin təməli qoyuldu. Beləliklə, ölkəmizdə dirçəliş, bütün sahələrdə irəliləyiş başlandı.
Prezident İlham Əliyev Azərbaycanın Birləşmiş Ştatlarla münasibətlərə strateji önəm verdiyini, təhlükəsizlik, iqtisadi əməkdaşlıq sahəsində qarşılıqlı anlaşmanın mövcudluğunu vurğuladı. Azərbaycanın zəngin təbii sərvətlərinin olduğunu, xarici sərmayələrin cəlb edilməsi üçün hər cür şərait yaradıldığını bildirən Prezident İlham Əliyev ölkə iqtisadiyyatının sürətli inkişafından da danışdı. Dövlətimizin başçısı Ermənistan-Azərbaycan, Dağlıq Qarabağ münaqişəsinin tarixindən, onun ölkəmiz üçün acı nəticələrindən bəhs etdi, problemin həllinə dair danışıqlar prosesi barədə də ətraflı məlumat verdi.
Tanınmış ictimai-siyasi xadimlərin, diplomatik korpusun təmsilçilərinin, qeyri-hökumət təşkilatlarının, mətbuat nümayəndələrinin iştirak etdikləri görüşdə Prezident İlham Əliyevə çoxsaylı suallar verildi. Dövlətimizin başçısı Ermənistan-Azərbaycan, Dağlıq Qarabağ münaqişəsi ilə bağlı suala cavabında dedi ki, Azərbaycanın ərazi bütövlüyü məsələsi danışıqlar mövzusu deyildir, Ermənistan monoetnik dövlətə çevrilmiş və bütün regional layihələrdən kənarda qalmışdır. Ermənistan güclü inkişaf edən Azərbaycanla düşmənçilik etməməlidir. Prezident İlham Əliyev xüsusi vurğuladı ki, biz Dağlıq Qarabağa Azərbaycanın ərazi bütövlüyü çərçivəsində ən yüksək muxtariyyət statusu verməyə hazırıq. Bakı-Tbilisi-Ceyhan neft kəməri ilə bağlı suala cavab verən dövlətimizin başçısı vurğuladı ki, boru kəməri yaxın vaxtlarda işə düşəcək və Azərbaycan neftini dünya bazarlarına çatdıracaqdır. İran məsələsi ilə bağlı sualla əlaqədar Prezident İlham Əliyev dedi ki, Azərbaycan regionda bütün məsələlərin sülh yolu ilə həllinə tərəfdardır. Azərbaycan ilə İran arasında imzalanmış sazişə görə, ərazilərimizdən bir-birinə qarşı hərbi məqsədlərlə istifadə edilə bilməz.
Dövlətimizin başçısı Azərbaycan-Rusiya münasibətlərinə də toxunaraq bildirdi ki, əlaqələrimiz bütün sahələrdə uğurla inkişaf edir. İqtisadi inkişaf, qarşılıqlı əməkdaşlıq yolu tutan Azərbaycan heç vaxt qarşıdurma məkanına çevrilməyəcəkdir.
Prezident İlham Əliyev Azərbaycanda demokratikləşmə prosesi, ABŞ-Azərbaycan ikitərəfli əlaqələri və “rəngli inqilablar” barədə suallara da ətraflı cavab verdi.
Bölmənin digər xəbərləri
