Beynəlxalq Muzeylər Günündə “Dünya bizim hamımızın” adlı proqram təqdim olunacaq
Bakı, 16 may, AZƏRTAC
Cəfər Cabbarlı adına Azərbaycan Dövlət Teatr Muzeyi 18 may - Beynəlxalq Muzeylər Gününə “Dünya bizim hamımızın” başlığı altında hazırladığı proqramla qatılacaq.
AZƏRTAC xəbər verir ki, proqrama “Birgə və Sağlam İctimai Birlik” ətrafında toplaşan spektr pozuntular qrupundan olan uşaqların rəsmlərindən ibarət virtual sərgi və “Əsa” İnklüziv Teatrının “Göy quş” tamaşasının sosial şəbəkədən canlı yayımı daxildir. Virtual sərgi muzeyin “facebook” səhifəsindən saat 12:00-da, tamaşa isə 17:00-da yayımlanacaq.
Eyni zamanda, Beynəlxalq Muzeylər Günündə Cəfər Cabbarlı ev-muzeyi tamaşaçılara “Dan ulduzu” adlı fotosərgini təqdim edəcək. Sərgidə izləyicilər muzeydə qorunan nadir tarixi eksponatlarla, eləcə də muzeyin müxtəlif illərdə həyata keçirdiyi uğurlu layihələri və maraqlı tədbirləri əks etdirən fotolarla tanış olacaqlar.
Bölmənin digər xəbərləri
